Datorren asteartean bukatuko da epea, Oporrak Bakean programaren barruan, aurtengo udaran haur sahararrak etxean hartzeko. Eta Hernanin, oraindik, hiru harrera familia besterik ez daude, beste urte batzuetatik errepikatu dutenak: «larrialdi dei bat egin nahi dugu, lau familia berri behar ditugulako. Aurreko urteotan, zortzi familia ere izan ditugu; baina aurten hiru errepikatzaile besterik ez dauzkagu, ez daukagu harrera familia berririk, eta pena haundia da», adierazi dute Oporrak Bakean programaren arduradunek.
Hitzaldi informatiboa, gaur
Familia berriak animatzeko asmoz, hitzaldi informatiboa antolatu dute gaur, arratsaldeko 19:00etan Biterin. Bertan izango dira programako arduradunak, azalpenak emateko; eta baita zenbait harrera familia ere, beraien esperientzia kontatu eta bertaratuen zalantzak argitzeko.
Programan izena eman nahi duten familiek, edota informazio gehiago nahi dutenek, hiru bide dauzkate: Aristizabal 7 lokalean, 943 33 70 17 telefonora deituta, edo marijo-m@hernani.eus emailean.