Hernanira iritsiko da gaur Laburbira, euskerazko film laburren zirkuitua. 15garren edizioa izango du aurtengoa, 29 herri bisitatuta; eta urtero bezala, Hernani egongo da horien artean, Dobera Euskara Elkartearen eskutik.
Sandiusterrin izango da, arratsaldeko 18:30etan hasita, eta hilabete honetako Zinea Euskaraz! saioa eskainiko diote Laburbirari. Sarreraren truke, borondatea eskatuko dute.
Zortzi filmek osatzen dute zirkuitua, eta helburua da, «euskerazko sortzaileen lana ezagutaraztea, euskeraz ekoizten jarraitu dezaten aukera emanez, eta ikusleei geurean sortutako film frexkoez gozaraztea», azaldu dute.
Ordu eta laurdeneko saioa
Jarriko dituzten film labur gehienak, 2017an ekoiztutakoak dira, guztiak euskeraz, baina elkarren artean oso desberdinak: «umorea, intriga, kritika, gure historiari begirada, edota kulturaren eta hizkuntzaren transmisioari keinua dira, besteak beste, saioaren osagaiak», aurreratu dute.
Ordu eta laurdeneko saioa izango da, eta hauek dira, ikusiko diren zortzi filmak: Ilunpetan (Koldo Carranzarena), Night Shift (Izaskun Arandia), Higadurak (Oihane Zunzunegi eta Amaia Otaola), Ejecutor (Javi Arriaga), Tazan (UDA films), Areka (Atxur animazio taldea), Kreba (Oier Fuentes), eta Zulo (Erika Olaizola eta Amancay Gaztañaga).
Landetxe batean asteburuko egonaldia, zozketan
Gainera, aurreko urtean bezala, lehiaketa antolatu dute, Laburbirako ikusleen artean: landetxe batean bi lagunentzako bi gaueko egonaldia zozketatuko dute.
Parte hartzeko, sartu behar da www.kameratoia.eus web orrian, Laburbira 2018 ikusleentzako zozketa atalean; eta bertan dagoen galdetegia erantzun. Emanaldiaren ondoren egin behar da hori, noski.