Haurreskolaren gaia izan da legegintzaldi honetako protagonistetako bat, eta gai horri heldu dio, oraingo honetan, EH Bilduk prentsa-ohar bitartez: «EH Bilduk proposatutako Haurreskolaren kokapena onartu du EAJk bi urteren ondoren».
Oharrean dioenez, «azken Plenoan, EAJk 800m2ko lokala Haurreskolarako izango dela adierazi zuen». «Aho txikiarekin» onartu zuela diote; hala ere, EH Bilduk «positiboki baloratzen du. Pozgarria da urte hauetan oposiziotik egindako lanak balio izan duela ikustea».
Mozioa, 2016an
Legegintzaldiaren hasieratik izan da gai garrantzitsua Haurreskolaren haundipenarena, eta ordutik ere, eztabaida izan da kokapenaren inguruan. Hori ikusita, EH Bilduk mozioa aurkeztu zuen 2016ko azaroaren 19ko Plenoan. Bertan, besteak beste, eskatzen zen «Urumea Berrin Udalak jasoko duen 800 m2 inguruko lokalean Haurreskola behin betiko kokatzea 2018an martxan izan dadin». EH Bilduren eta PSE-EEren aldeko botoa jaso zuen mozioak, udal taldeak adierazi bezala; EAJk, aldiz, puntu horren kontra bozkatu zuen.
EH Bilduren ustez, «ordutik, EAJ noraezean eta guztia nahasiz ibili da. Bere lehen proposamena Haurreskola egungo Kultur Etxean kokatzea izan zen. Ondoren, AGUIn egingo diren etxepeko lokala etorri zen. Gero, Arrobitxuloko harrobiaren kokalekua mahaigaineratu zuen. Azkenik, Urumea Berriko Kontxa Etxeberria plazara gerturatu zen, baina ez EH Bilduk proposatutako lokalera, txikiago batera baizik (550m2). 550m2ko lokal hori etorkizunean txikiegia izango zela onartuz, egungo Haurreskolaren lokal haundia mantentzea ere proposatu zuen».
«Ziur atzeratuko dela»
Kokapena erabakita, EH Bilduren hitzetan, «argi dago EAJ ez dela gai izango 2016ko azaroan Udal Osoko Bilkurak emandako mandatua betetzeko: Haurreskola berriak 2018an zabalik behar luke baina EAJren utzikeriak haur-eskola berriaren proiektua atzeratu du. Estimazio onenen arabera, 2020 urte hasierarako egon liteke prest haurreskola berria, baina EAJren erritmoa eta arduragabekeria ikusita EH Bildu ziur dago atzeratuko dela».
Hori horrela, EH Bilduk dio: «proiektua bikaina egin dadin saiatuko gara, eta horretarako, guraso eta hezitzaileen partehartzea bermatzea eskatuko du».