Aurreko ostegunean aurkeztu zuen Udalak, Portu eta Elizatxoko espazio publikoa eta bizilagunen mugikortasuna hobetzeko hiru urteko plana. Eta hartutako neurrien artean, nabarmenena izan da Oindi kaleko trafikoa etengo dela, 20 minutuz, eskolako sarrera eta irteera orduetan.
Neurri horren aurrean, bere desadostasuna azaldu nahi izan du, Elizatxo ikastolako guraso talde batek, eta hainbat arrazoi eman ditu: «badirudi helburuetako bat dela, eskolara oinez joatea eta kotxearen erabilera murriztea; zer irtenbide dago, ikastolatik urrun bizi diren haurrentzat? Zer gertatzen da ume txikiekin? Guraso asko ere, lanera sartu edo ateratzen dira ordu horietan, haurrak utzi ondoren edo jaso aurretik, eta kotxea behar dute; non geratzen da kontziliazio familiarra-laborala neurri honekin? Gainera, asko oztopatuko da Elizatxoko aparkalekura sarbidea; zein da alternatiba? Esan digute Leoka edo Shangai tabernaraino joan gaitezkeela kotxean, eta haurrak han utzi; zer gertatzen da haur txikienekin? Trafikoa arriskutsua bada, zergatik mugatzen da gurasoena bakarrik, eta ez auzoetako bizilagunena? Zergatik hartu da neurria Elizatxo ikastolan bakarrik, Hernaniko eskola guztietan gertatu arren?».
«Familia batzuentzat, beharra da ikastolara kotxean joatea, ez kapritxoa», diote.
Bestalde, diote gaia eztabaidatzeko foroan, ikastolako gurasoen ordezkaritza ez dela egokia izan: «badirudi ez dela inor agertu, edo behintzat ez direla guraso guztion interesak defendatu. Gure akatsa da bileretara ez joan izana, beste batzuk joango zirelakoan. Baina gurasoen ordezkaritza falta bazen, zergatik ez zitzaigun abixatu, horrelako erabaki zorrotzak hartu aurretik?».
«Ados gaude, zonaldeak erreforma urbanistiko garrantzitsua behar duela»
Guraso talde horrek dio, era berean, ados daudela zonaldeak «erreforma-berregituratze urbanistiko garrantzitsua» behar duela: Portuko tunela espaloirik gabea eta estuegia, auzoko sarreratik Shangai tabernara espaloirik ez, bide estuegiak, Leokako eskaileren egoera txarra, trenbide ondoko bidearen egoera txarra, auzoetako sarbideak hobetu beharra...
«Baina ez da bidezkoa, arazo larri hauek konpontzeko, aurreneko neurria izatea ikastolako gurasoei kotxean pasatzea debekatzea; urruti bizi garelako, lanera joan behar dugulako edota mugikortasun arazoak dauzkaten umeak daramazkigulako. Familia batzuentzat, beharra da ikastolara kotxean joatea, ez kapritxoa».
Diote, ez dutela uste neurria eraginkorra izango denik: «trafiko arazoa inguruetara eramango du; gaizki aparkatutako autoak, Pipirita aldapan kolapsoa, eta ordu nagusietan udalerriko irteera bat bertan behera uztea».
Horregatik, «kostu baxuko alternatibak» proposatu dituzte, epe luzeko arazo urbanistikoak konpondu arte: «ibilgailuak moteltzea badenekin, tunela semaforo bidez erregulatzea, mugikortasun agenteen presentzia, eta ikastola inguruko espaloiak berreskuratzea».
Horrekin, Udalari eskatu diote, lehengora bueltatu eta alternatiba bat adostea.