Bueltan da Bertso Gutiziak saioa. Kronikak antolatuta, eta Insalusen laguntzarekin, bertsoak eta afaria uztartzen dituen ekimena apirilaren 20an egingo da, arratsaldeko 19:00etan, Basque Culinary Centerren, eta sarrerak asteartean jarriko dira salgai.
Aurtengoan, Maialen Lujanbio, Unai Agirre, Aitor Mendiluze eta Aitor Sarriegi ariko dira bertsotan, eta gai-jartzaile lanetan, Amaia Agirre.
Ondoren, ohi bezala, BCCeko ikasleek prestatutako jaki goxoak dastatu ahal izango dira.
Sarrerak, ohiko lekuetan
Aurrena Kronika-Doberako bazkideei eman nahi zaie aukera, sarrerak erosteko. Horrela, Kronikako bulegoan bertan erosi ahal izango dituzte, larunbatera arte, 20 euroan.
Bazkide ez direnek, berriz, hilaren 26tik aurrera erosi ahal izango dituzte, 22 euroan, ohiko lekuetan: Hernanin, Kronikaren bulegoan (Larramendi, 11), eta Kixkal eta Aralar tabernetan; Ereñotzun, Irrintzi tabernan; Astigarragan, Ikatza tabernan; eta Goizuetan, Amaia kafetegian.
Autobuserako izenematea, sarrerak erostean
Bestalde, aurreko urtean bezala, gauean BCCetik Hernanira bueltatzeko autobusa jarri nahi da, baina izena ematen duten lagun kopuruaren arabera jarriko da. Beraz, sarrerak erostean jakinarazi beharko da autobusa nahi den ala ez.