«Zergatik baimendu zuen EH Bilduk, igerilekuak horrela egitea? Orain, instalazio okerragoak dauzkagu»

Kiroldegiko igerileku berrien obrarekin, kritiko azaldu da Hernaniko EAJ-PNV, prentsa ohar baten bitartez. Azaldu du, 2017ko abuztutik ari dela igerilekuen obrengatik galdezka. «Garaiz bukatu ez ziren obra ba­tzuk dira, bere kostua haun­ditu egin zen 2.164.702,54 eurotik 2.570.247,85 eurora eta in­bertitzen jarraitu behar da; eta guk zalantzan jartzen du­gu, jarri diren elementuak, ho­beak ote diren lehengoak baino: klo­roa kudeatzeko, lehen ez zena manipulatzen eta orain hala egin behar dena; ozonoa ku­de­­atzeko, instalazio berriarekin aurreikusten ez zena baina jarri behar dena; berogailua; ura berotu eta aireko hezetasuna kentzekoa...», dio EAJk.
Era berean, uste du ez dela erabili material zaharretik ezer, «ez baitituzte gure galderak erantzuten»; eta dio derrigorrezkoa zela, egoera onean zegoena berrerabiltzea: «zerga­tik ez zen ondo babestu ozonoaren makina? Zergatik ez di­ra igerileku haundiko filtroak era­bili oraingo igerileku txikian?».
EAJk dio, baita ere, igerileku txikiko tenperatura 2 gradu jaitsi dela, «legeak mantentzea baimendu arren», eta gurasoak kexu direla, haurrak izoztuta ateratzen direlako: «120 sinadura bildu dira». Eta dio, izoztuta geratzen dela jendea, pasilloetan eta aldageletan ere, tenperatura oso bajua delako; igerilekuek fugak dauzkatela eta makinen gelan goterak sortzen direla; edota dutxetako uraren presioa eta kopurua nabarmen gutxitu dela.
EAJk azaldu du, «burugabe­keria» nabarmenetako bat, he­zetasuna kentzeko makina dela: «bere ateak paretaren kon­tra daude; nola sartzen dira makina puntuan jartzera? Gai­nera, makina osatzen duten bi blokeak, alineatuta egon beha­rrean, zinta amerikanarekin lotuta daude».
Horren aurrean, EAJk azaldu du, igerilekuen tripetan lane­an aritzen diren enpresei gal­detu diela: «eman dizkigu­ten datuekin, uste dugu instalatutako elementuek ezingo du­tela zerbitzu egokirik eman, igerilekua errendimendu osoan dagoenean».
Horregatik, galdetu du: «diru publikoa modu bidegabean erabili da obra honetan? Zer­ga­tik baimendu du EH Bilduk igerilekuak horrela egitea, eta orain Hernanik instalazio haun­diagoak bai, baina lehen­goak baino okerragoak izatea?», kritikatu du EAJk.