Eusko Jaurlaritza merkataritza-gune haundiei buruzko Lurralde Arloko Plana egiten ari da egun, eta hain justu, hori aprobetxatu dute EH Bilduko Gipuzkoako herrietako hautetsiek, horien inguruko kezka kaleratzeko.
Hain zuzen, Astigarraga, Hernani, Irun, Hondarribia, Errenteria, Lezo, Pasaia, Oiartzun, Donostia, Lasarte-Oria, Andoain eta Usurbilgo ordezkariak izan ziren bertan: «geure lurraldearen garapen iraunkor eta orekatuarekin lotutako eskaintza egin nahi dugu».
Eskaera luzatu diete, bereziki, EAJri eta PSE-EEri.
Kezka «partekatua»
«Kezka dugu, eta kezka hori partekatua da Gipuzkoako hainbat sektore sozioekonomikotan, merkataritza-gune haundien zabalkundeak hankaz gora jarri ditzakeelako dagoeneko ahul xamarrak izan daitezkeen orekak», hasi ziren azaltzen.
Hain justu, gaur egun Donostia inguruan merkataritza-guneek 180.000 m2 hartzen dituztela azaldu zuten: Txingudi, Lintzirin, Urbil, Garbera, Belartza... «Gaur egungoa gutxi ez, eta azken aldian maiz ari zaizkigu iristen merkataritza-gune haundiei buruzko albisteak. Gune berrien proiektuak nonahi sortu dira».
«Mahai gainean dauden proiektu guztiak gauzatzen badira, beste 200.000 bat metro koadro izango ditugulako, datozen urteetan, eremu txiki honetan», azaldu zuten. Eta aipatu zituzten, besteak beste: Zaldunbordako outlet berria, Hondarribian; Garberaren zabalkundea, Ilunbe eta Belartza 2 Donostian; Teresategi eta Michelin, Lasarte Orian; Urbilen haunditzea, Usurbilen…
Gainera paradoxa bat ere aurkeztu zuten: «haunditzeko joera hori ez dator bat mundu zabalean, eta guregandik gertu ere, nabarmentzen den ereduaren krisiarekin. Gaur egun, merkataritza-guneak ixten ari dira. Joera orokorra da, bestelako eredu batzuek, bereziki online merkataritzak, hartu duten indarrarengatik».
Oreka, helburu
Aldarrikatu zuten, hain zuzen, oreka bilatu beharra dagoela salerosketen munduan: «lurralde osoaren garapen iraunkorra bilatu nahi badugu, eta herri eta auzo biziak nahi baditugu, oreka ezinbestekoa da. Proiektu berrien presakako tramitazioek desestabilizazioa ekar dezakete. Onar dezagun orain ere ahula dela oreka hori eta kaltetu nagusia, zalantzarik gabe, merkataritza txikia dela». Adibide gisa aipatu zuten, Donostian 557 denda itxi direla azkenaldian.
Erregulazioa, beharrezkoa
Horregatik guztiagatik, «sektrorea erregulatzea» ezinbestekoa ikusten dute: «inoiz baino beharrezkoagoa da merkataritza-, kontsumo- eta bizi-ohiturak zaintzea, eta gure herrietako izaera, erro sakonak dituena, babestea».
Horregatik eskaera luzatu diete, bereziki, EAJ eta PSE-EEri: «batetik, Eusko Jaurlaritzaren Lurralde Arloko Plan berrian, merkataritza-gune haundiei 2004an ezarritako mugak berreskuratzea, eta bestetik, moratoria bat aplikatzea. Eta, halaber, plan hori onartu bitartean, Donostia inguruko udalek inongo garapenik ez ahalbidetzea».