Aste Santurako gero eta gutxiago falta da, eta familia gehienak ari dira haurren oporraldirako planak egiten. Lan horretan laguntzeko, hainbat eskaintza izaten dira Astigarragan, tartean, Udaleko kultura arloak antolatzen dituen Aste Santuko tailerrak dira.
Hain zuzen, martxoaren 26tik apirilaren 6ra bitarte luzatuko dira eta dagoeneko irekita dago izena emateko epea. Horretarako, Kultur Etxearekin jarri beharko da harremanetan: 943 33 50 64 telefonoan edo kultura@astigarraga.eus.
Lau tailer, aukeran
Denera lau tailer izango dituzte aukeran 6 eta 12 urte bitarteko gaztetxoek. Bi martxoaren 26tik 28ra, eta beste bi, apirilaren 3tik 6ra. Horiek izango dira, hurrenez hurren: Erritmo exotikoak eta sukaldaritza tailerra; eta zientziarekin jolasean eta sukaldaritza osasuntsua.