Ligako momentu erabakigarrian sartu da Hernani, jubenilen Ohorezko Maila nazionalean. Lau partidu besterik ez dira geratzen, eta jaitsiera postuetan daude; baina badaukate mailari eusteko aukera. Eta horretarako, bereziki klabeak izango dira hurrengo bi partiduak, Zubipen.
Bihar, Getxo hartuko dute txuri-berdeek, 17:30etan hasita. Hain justu, sailkapenean aurretik dagoen taldea da bizkaitarra, jaitsiera postuetatik kanpo, lau puntura. Beraz, irabaziz gero, jaitsieratik ateratzetik puntu bakarrera geratuko litzateke Hernani. Horregatik, zaleen babesa eskatu du taldeak; Zubipera jaitsi eta animatzea.
Biharkoa irabazita, hurrengoa ere klabea izango da: Antiguoko hartuko dute datorren asteburuan Zubipen. Sei puntu aurretik daude donostiarrak.