Etxean ariko dira gaurkoan, beste urte batez, Hernaniko txirrindulari alebin eta infantilak. Peña Otaño Saria jokatuko da, arratsaldeko 16:00etan hasita, Hernaniko kaleetan barrena.
JOCC txirrindulari elkarteak antolatuta, Urbieta kaletik abiatuko dira, Karrero tabernaren paretik, eta ohiko zirkuitua osatuko dute: Ertzainetako errotondara joan, Latsunbetik Zinkoeneara jaitsi, eta Txirrita kalean gora berriro Urbietara. Lasterketek iraun bitartean, kale horietan trafiko mozketak izango dira; eta Urbietako autobus geltokia, anbulategi aurrera mugituko dute.
Alebinen lasterketa izango da aurrena, eta beraiek, hiru buelta emango dizkiote zirkuituari. Infantilek, berriz, bederatzi buelta egingo dituzte, ondoren. Guztira, 80 neska-mutiletik gora ariko dira, herriko kaleetan barrena, bederatzi taldetakoak: Hernaniko JOCC, Astigarraga, Donosti Berri, Irunes, Oarsoaldea, Buruntzazpi, Zarauztarra eta Zumaiako txirrindularitza eskoletakoak.
Ginkana, ondoren
Lasterketak bukatzean, ginkana egingo dute, bigarren urtez. Hesiak eta oztopoak gainditu beharko dituzte txirrindulariek, eta abilezia haundiena erakusten dutenek irabaziko dute.
Latsunbeberrin egingo dute ginkana: txirrindulari infantilena, kirol pistan; eta alebinena, tenis pistan.