Kontzertu berezia eskainiko dute gaur, Milagrosa kaperan. Arratsaldeko 19:30etan hasita, Udaberriko kontzertua emango dute, bi abesbatzak: Goiz Eguzki abesbatzak, batetik; eta beraiek gonbidatuta, Zarauzko Udaberri abesbatza etorriko da, bestetik.
Bi abesbatzen artean, makina bat kanturekin osatutako egitaraua prestatu dute, herritarrei eskaintzeko: 16 guztira.
Goiz Eguzki abesbatza ariko da aurrena, Javier Zubimendik gidatuta, eta zazpi abesti kantatuko dituzte: Maite, Si se muere el mar, A ti, Itxasoa, Alma llanera, Azken dantza eta Baserritarra. Gero, Zarauzko abesbatzak hartuko du txanda, Patxi Azkarate zuzendariaren esanetara, beste zazpi abesti kantatzeko: Udaberri, Goizian argi hastian, Bihotz bat, Kuku, Irten ezazu, Mariñelak eta Illunabarra.
Eta bukatzeko, elkarrekin kantatuko dituzte beste bi: Kantuz eta Euskal Herriko.