Bilboko Gaylesbitrans 15. Nazioarteko Zinema eta Arte Eszenikoen jaialdian aurkeztutako sei film labur ikusteko aukera izango da gaur Biterin, 19:00etan hasita, Martxoak 8aren inguruan antolatutako ekitaldiei segida emanez.
Bihar, berriz, Jeanne Rolande Dacougna Minkette ikertzaile eta aktibista feministak hitzaldia emango du, 18:00etan.
Mundu zabaleko 6 film labur
Gaurkoan sei film labur ikusi ahal izango dira.
Homoamak film euskaldunean, Xabik emakume batekin maitemindu dela aitortuko die bere bi amei. Herbeheretako Sirene, nahasmena, laguntasuna eta norbera izateari buruzkoa da. Happy australiarrak, sexuan esperientziarik ez eta hitzorduetarako app bat deskargatzen duen gaztea du protagonista. Kanadatik datorren Marguerite filmak, emakume nagusi bat erizainarekin lotzen duen adiskidetasuna dauka oinarri. Ornitorrinco film espainiarrean, bien arteko harremana eten arren, familia bazkarian itxurak egingo dituzten bi emakume ageri dira. Azkenik, Szèp Alak (Itxura Ederra) hungariarra, garbitzaile eta ikasle baten arteko ezinezko maitasunari buruzkoa da.