Planto egin eta mobilizatzeko deia, nazioarteko grebarekin bat eginez

Ez da ohikoa izango, aurtengo Emakumeen Nazioarteko Egu­na, martxoaren 8a. Izan ere, emakumeen nazioarteko grebarekin bat egin du Euskal He­rriko Mugimendu Feministak, eta dei argia luzatu du egun ho­rretarako: Emakumeok* plan­to!

Eta bi galdera planteatu di­tu: «emakumeok planto egingo bagenu? Eta egiten dugun guztia egingo ez bagenu? Aurtengo martxoaren 8an ikusiko dugu», aurreratu du.

«Bide luze baten abiapuntu» bezala definitu dute, egun ho­rretakoa; eta guztiek bat egin de­zaten grebarekin, modu ba­te­ra edo bestera, zazpi aukera ezberdin planteatu dituzte: la­nuzteak egitea, mobilizazioetara joatea, amantalak edo ho­rre­lakoak balkoitik zintzilika­tzea, merkatuan kontsumitzeari uztea, greba zabaldu eta an­tolaketan parte hartzea, zain­tzeari uztea, eta besoko morea janztea.

Lau orduko lanuzteak, eta bi mobilizazio

Lanuzteak egiteko, lau orduko bi tarte zehaztu dituzte: goizean, 11:00etatik 15:00etara; eta arratsaldean, 18:00etan hasi eta 22:00ak arte. 

Mobilizazioe­ta­rako, berriz, bi ordu nagusi zehaztu dituzte: eguerdiko 12:00etan, eta ilun­tzeko 20:00etan. Ordu horietan egingo dituzte ekintzak edota manifestazioak, herriz herri.

Baina azaldu dute, badakitela «denek ezin dutela greba egin»; eta horregatik eman dituzte beste bost aukera, grebarekin bat egiteko, bakoitzak bere neurrian, sinbolikoki besterik ez bada, behintzat. Aman­talak, erratzak edo beste tresnaren bat balkoitik zintzilikatuta, zaintza lanak azaleratu nahi dituzte. Kontsumitzeari uztearena, berriz, «langileen es­plotazioaren ikur diren en­presa haundien» kontrakoko ekintza da, batez ere. Greba za­baltzeko deia ere luzatu dute, eta nork bere eskualdeko ekin­tzak antolatzen parte hartzeko. Zaintza lanak uztean, ez dutena nahi da beste emakumeen esku uztea, gainerakoen esku baizik. Eta bat egiteko azkeneko modua, sinbolikoa da: besoko morea janztea.

Izan ere, aldarrikatu dute, greba «guztiona» dela, eta ez dela ohikoa izango: «nazioarteko greba bat izango da ez da greba arrunta izango. Herriz herri sortuko diren ekintzekin osatuko da, eta mobilizazioak beste aldarrikapen batzuekin uztartuko dira».

Makina bat ekintza, Urumea bailaran

Horixe da gertatuko dena, Uru­mea bailaran ere: greba deialdiari eta mobilizazioei, batuko zaizkie herriz herri antolatu dituzten ekintzak.

Horrela, Hernanin egitarau zabala prestatu dute. Atzo ekin zioten, Gaztelekuan, Parekide taldeak antolatutako ekintzekin eta batukada feministarekin; eta artelanak eta kamixetak ere egingo dituzte Gaztele­ku­an, martxoaren 6an eta 7an. Martxoaren 8rako, hainbat zita jarri dituzte. Horien artean, 12:00etan Zerbi­tzu Sozialetan ja­rri duten hitzor­dua,  «bertan lan egiten duen gehien­goa emakumeak direlako, eta as­kok ezin dutelako greba egin, pertsonak zaintzeaz ardura­tzen direlako. Beraz, elkartasun keinua izango da». Eta 20:00etan, manifestazioa egin­go dute, Plaza Berritik. 

Beste hainbat ekintza ere izango dira egunean, eta baita hurrengo egunetan ere.

Astigarragan ere izango da makina bat ekintza. Martxoa­ren 6an egingo du bilera Talde Feministak, eta kazerolada dei­tu du martxoaren 8ko arra­tsalderako, udaletxeko plazatik abiatuta. Hori baino lehen, eguerdian, Emakumeon plazan egingo dute elkarretaratzea, grebarekin bat eginez.

Hurrengo egunetan izango dira ekintza gehiago eta itxiera emango diena, larunbatekoa izango da. Bakarrizketa antolatu dute Sagardo Plazan, Mirarikeriak ‘komilla tartin’; eta ho­rren ondoren izango da zita be­rezienetako bat: herritarrek proposatutako emakumeak omentzeko, ekitaldia egingo dute bertan.

Eta Goizueta eta Aranoko herritarrek ere, ekintza ugari izanen dituzte, egun seinalatuaren bueltan. Goizuetan, kontzentrazioa eginen dute martxoaren 8an, Plazan; eta emakumeen afaria ondoren. Martxoaren 10ean, berriz, ema­kumeen lanaren bueltan izanen da Goizuetan Lan eta Bizi saioa. Eta hilaren 28an, azkenik, antzezlana eskainiko dute eskolako jangelan.

Aranon, berriz, Pino Vicedo herriko artisauaren ilustrazio erakusketa ja­rriko dute mar­txoaren 8an, Maisuenean: Ama lurraren eskuak. Eta martxoaren 9an, Cuidado, resbala do­ku­mentala jarriko dute, Mai­suenean hori ere.

Eta Ereñotzun, Itziar Zunzu­ne­giren hi­tzaldia an­tolatu dute, martxoaren 7an: Hezki­de­tzaz eta fe­minismoaz. Eta etxean zer?

Emakume jubilatu eta pentsiodunek ere, planto

Dagoeneko bada, nabarmendu duenik bat egingo duela, greba deialdiarekin. Horien artean daude, emakume jubilatu eta pentsiodunak. Hala jakinarazi du Duin­ta­su­­­na elkarteak; Gi­puzkoako Jubilatu eta Pentsio­dunen el­karteak, hain zuzen ere: «ez dugu erosketarik egingo, ez dugu otordurik prestatuko, eta ez dugu zaintzarik beteko. Beti lan eta lan, mar­txoaren 8an planto!».

Planto egingo dute, baita ere, Gaztelekuko emakume hezitzaileek ere, eta gizonezkoek hartuko dituzte beraien ardurak. Eta baita Iturola el­karlan sorguneko emakume ekintzaileek ere; gizonezkoek eskainiko dute zaintza zerbi­tzua martxoaren 8an, goizeko 11:00etatik 15:00etara.

EMAKUMEOK* PLANTO M8 GREBA FEMINISTA

Iaz, 70 herrialde baino gehiagotan, emakumeek* nazioarteko emakumeen* grebarako deialdia zabaldu zuten, emakumeen* kontra indarkeria eta desberdintasun molde ugari eragiten di­tuen munduaren aurrean.

Aurtengo martxoaren 8an Eus­­kal Herriko mugimendu fe­mi­nistak bat egin nahi du EMAKUMEOK* PLANTO aldarriarekin, menpean hartzen eta zapaltzen gaituen sistema kapitalista, arra­zista eta heteropatriarkala salatzeko. Honako eguna bide luze baten abiapuntua izango da. Bide horretan, aliantza berriak ehunduko ditugu, bateratuz eta elkar ezagutuz, gure borrokak berriz pentsatuz, erresistentzia berriak eraikiz, eta baztertzen gaituen mundutik askatuz, betiere alternatiba feminista bat sortzeko helburuarekin.

Sistema honek sexuaren araberako lan banaketa bultzatzen du, eta ezkutatzen eta gutxiesten ditu bai feminizatutako ogibideak, bai bizitzaren iraunkortasunarekin eta zaintzarekin lotutakotako lanak (hazkuntza, heziketa, biziraupenerako nekazari­tza, mendekotasun egoeran daude pertsonen arreta, elkartasun sareak, euskarri afektiboa...). Sistema honek ez ditu emakumeen* enpleguak modu berean baloratzen (guk urtean batez beste gizonek baino 7.489 euro gutxiago kobratzen ditugu), feminizatutako lanbideen eta autonomoen prekarietatea sustatzen du, eta ikusezin bilaka­tzen ditu zaintza lanak, neurri handi batean emakumeek* doan eginak, eta nagusiki migratutakoek. Etxeko langileen %87 atzerritarrak dira, %46 etxe barneko langileak dira, eta herenak baino gehiagok ez dute lan kontraturik. Sistema honek gure burujabetza ekonomikoa oztopatzen jarrai­tzen du, bigarren mailako soldatekin zigortzen gaituzten aldi baterako eta lanaldi partzialeko kontratuen bitartez (lanaldi partzialen %76,3 emakumeei* dagokie, eta emakumeen* 27,6k aldi baterako kontratua dute). Baina, era berean, horrek guztiak gure bizitza pertsonala, soziala eta politikoa bateratzea eragozten duen gurpil zoro batera bul­tzatzen gaitu. Sistema honek indarkeria ekonomikoaz jazar­tzen gaitu.

Egiturazko desberdintasun sistematikoaz zipriztindutako testuinguru horretan, hainbat indarkeria moldek (sexista, arrazista eta klasista) zeharka­tzen gaituzte, haien artean elkar gu­rutzatu eta behin eta berriz errepikatzen dira. Ez dago hilketa, sexu eraso edo jazarpenik gabeko egunik. Bitartean, hedabideek gure arreta desbideratzen dute, ahaztu eta dirua xahutu leloa gauzatzera animatzen gaituzten kontsumo eredu berrien bidez. Haien helburua lortzeko ez dute nolanahiko estrategia erabiltzen: emakumezkoen* irudiak balia­tzen dituzte sexu objektu gisara, eta estereotipo sexistak sistematikoki barreia­tzen dituzte. Eta bitartean, eskoletan hezkuntza sistema patriarkal eta androzentrikoa nagusitzen da, emakumeen* ekarpen historikoak albora­tzen dituena, merkatuko premietara zuzendutako gaiak eta edukiak hobesten dituena, eta genero rolak auzitan jarriez eta erro­tzen dituena.

Horrenbestez, emakumeek, lesbianek, transek, migratutakoek gure aniztasun osoan PLANTO EGINGO DUGU! Eta martxoaren 8an greba feministarako deialdia zabalduko dugu EZETZ esateko, nahikoa dela, hitz-jario ustelekin eta ekintzen eskasiarekin ne­ka­tuta gaudela, diskurtso hu­tsalek ez zaizkigula jadanik balio. [...]

Nazioarteko greba bat izango da. Ez da greba arrunta izango: herriz herri sortuko diren ekin­tzekin osatuko da, eta mobilizazioak beste aldarrikapen batzuekin uztartuko dira.

Gure aniztasunetik zabaltzen dugu greba feministarako deia Euskal Herrian; alegia, gure gorputz, gure bizipen, gure adierazpen molde, munduan egoteko modu ezberdinen aniztasunetik. Jakin badakigulako zeharkatzen gaituzten desberdintasun eta prekarietateek patriarkatuaren borrokan, soldatapeko lan munduan, zaintzan, kontsumoan eta gure eskubideen erabileran leku anitzetan kokatzen gaituztela.

Greba GUZTIONA DA!

Eta planto egingo bagenu? Eta egiten dugun guztia egingo ez bagenu? Aurtengo martxoaren 8an ikusiko dugu.

*‘Emakume’ izendapena erabiliko dugu, martxoaren 8ko gre­ba feministan artikulazio po­li­ti­ko­ra­ko baliagarria delakoan, nahiz eta genero sistema bitarraz gaindi askotariko gorputz, ibilbide, bizipen, ahalmen eta identitateak bagaren (bollerak, transak...).

Euskal Herriko Mugimendu Feministaren manifestua; osorik irakurtzeko eta informazio gehiago: grebafeminista.wordpress.com

Nola egin dezaket bat M8ko grebarekin?

Zazpi modu ezberdin planteatu dituzte, guztiek eduki dezaten aukera, grebarekin bat egiteko, modu batera edo bestera, sinbolikoki bada ere.

- Lantoki eta ikasgeletan lanuzteetara batuz.
- Herri eta hirietako mobilizazioetara joanez, bi hitzordu nagusi: 12:00etan eta 20:00etan.
- Amantala (edota beste edozein tresna) balkoitik zintzilikatuz zaintza lanak azaleratzeko.
- Merkatuan kontsumitzeari utziz, batez ere langileen esplotazioaren ikur diren enpresa handietan, objektutzat hartzen gaituztenak.
- Greba zabalduz eta antolaketan parte hartuz. Ikasle­en la­nuzte eta mobilizazioekin bat eginez.
- Zaintzeari utziz, lan hori beste emakumeen* esku utzi gabe, besteek egin dezatela!
- Edonon zaudela, besoko morea jantziz. Zuk zeuk egin ezazu!

MARTXOAREN 8A URUMEA BAILARAN

Goizuetan

- Martxoak 8: 
18:00etan, Kontzentrazioa, Plazan.
21:00etan, Emakumeen afaria, Umore Ona elkartean.
- Martxoak 10, Goizuetan Lan eta Bizi: emakume ekoizleak. Maite Sanchez, Gotzone Sestorain eta Maialen Chantre (Mugarik Gabe Nafarroa). 18:00etan, udaletxeko batzar aretoan.
- Martxoak 28, Antzerki: eskolako genero tailerretako lanketaren emanaldia. 11:00etan, eskolako jangelan.

Astigarragan

- Martxoak 6, Talde Feministaren bilera, Joseba Barandiaran plazan, 18:00etan.
- Martxoak 8: 
12:00etan, Emakumeok* Planto! greba feminista babesteko elkarretaratzea, Emakumeon plazan.
18:45etan, Kazerolada, udale­txeko plazatik aterata. Gero, Donostiara joateko deia, Talde Feministak.
- Martxoak 9: 
17:00etan, Hitzaldia, kultur etxean: Euskal mitologia eta kultura matrilineala. Euskeraz eta gaztelaniaz.
18:30etan, Zine Foruma, kultur etxean: Volar.
- Martxoak 10, Bakarrizketa, 17:00etan Sagardo plazan: Mira­ri­keriak ‘komilla tartin’. Ondoren, he­rri­tarrek proposatutako emakumeak omentzeko ekitaldia.

*Udaleko Berdintasun Sailak, Harituz Elkarteak eta Gaztelekuak antolatuta.

Aranon

- Martxoak 8, Ilustrazio erakusketa: Ama lurraren eskuak, Pino Vicedo artisau aranoarraren eskutik. 18:30etan, Maisuenean.
- Martxoak 9, Dokumentalaren pro­iekzioa: Cuidado, resbala. 18:30etan, Maisuenean. Jarraian, hitzaspertua.

Ereñotzun

- Martxoak 7, Hitzaldia: Hezkidetzaz eta feminismoaz. Eta etxean zer?, Itziar Zunzunegiren eskutik. 18:30etan, ludotekan.

Hernanin

- Martxoak 6 eta 7, Artelanak eta kamixetak. 17:30etatik 19:30etara, Gaztelekuan.
- Martxoak 8, Greba feminista: Emakumeok* Planto! 
12:00etan, Hitzordua Zerbitzu Sozialetan. Ondoren, ibilaldi zaratatsua Kaxkoan zehar.
13:00etan, Emakumeen kulturarteko bazkaria, Santa Barbara elkartean. Amherreko ema­kume taldeak antolatuta.
18:00etan, Tribial feminista.
20:00etan, Manifestazioa Plaza Berritik, Koordinadora Feministak antolatuta.
- Martxoak 10, Autodefentsa feminista tailerra, 10:00etan Biterin. Bilgune Feministak antolatuta.
- Martxoak 11, Zineforuma: Sufra­gistak. 17:00etan, Gaztelekuan.
- Martxoak 13, Zinegoak, Gayles­botrans zinema eta arte eszenikoen jaialdia. 19:00etan Biterin. Berdintasun Kontseilua eta Udala.
- Martxoak 14, Tesiaren aurkezpena: (De)construyendo identidades, imaginarios y prácticas. Mujeres migrantes africanas en la encrucijada. Jeanne Rolande eta Dacoug­na Minkette. 18:00etan Biterin. Berdintasun Kontseilua eta Udala.