hernaniar asko mugitzen dituen ekimena izaten da Antzerki Zikloa. Martxoaren 20tik 22ra izango da aurtengo udaberriko edizioa, eta hiru proposamenak hauexek dira: Soka, Ergela eta Txarriboda. Saio guztiak Biterin izango dira, 20:00etan hasita. Izaten den mugimendua medio, urteroko legez, sarrerak aurretik salduko dituzte. Gaur jarriko dituzte Biterin, erdiak goizean, 09:00-13:00 ordutegian; eta beste erdiak arratsaldean, 16:00-20:00 ordutegian. Interesa duenak gaur gerturatzea du onena, berehala agortzen baitira.
‘Soka’ gazteleraz eta ‘Ergela’ eta ‘Txarriboda’ euskeraz
Hiru emanaldien artean bat gazteleraz izango da eta beste biak euskeraz. Soka (Cuerda) da zikloa estreinatuko duena eta bera da gazteleraz eskainiko dena. Ergela eta Txarriboda aldiz, euskeraz izango dira.
Hiru antzezlanak denbora gutxi daramate antzeztokietan eta arrakasta eta kritika onak izan dituzte. Euskal Herrian dauden hiru konpainia garrantzitsuek ekoizten dituzte -Ttanttaka, Txalo eta Hika- eta bertan euskal eszenan gaur egun dauden aktore entzutetsuenetakoak ikusi ahalko dira Biteriko oholtza gainean.
Gainera, Biteriko areto nagusia berritu dute eta lehenengo aldiz antzerki zikloa areto eraberrituan eskainiko dute. Leku gehiago dago, baina gogoratu, sarrerak azkar agortzen dira.
‘soka’
Martxoak 20, gazteleraz
Soinketako irakasle batek 11 urteko mutiko baten gorpua aurkitzen du, gimnasioko sokatik urkatuta. Gertatutakoaren erruduna balitz bezala, bere inguruak baztertuta, Igorrek errua eta erantzunkizunaren arteko mugak marrazten diren bilaketa bati ekiten dio.‘ergela’
Martxoak 21, euskeraz
Ekonomikoki estu dabil Ergela antzezlaneko protagonista. Dirua azkar irabazi nahi du eta aukera paregabea topatu du: ikerketa psikologiko baterako izena ematea. Dirua modu horretan erraz lortu dezakeela pentsatzeagatik da ergela, enpresariak ez baitio bidea horren erraz utziko. Joseba Apaolaza da ergel hori gorpuzten duen aktorea eta Sara Cozar berriz, ikerketa psikologikoa egingo diona.‘txarriboda’
Martxoak 22, euskeraz
Mireiak eta Imanolek ezkongai bikote perfektua osatzen dute. Zorionaren irudi dira. Ezkondu egin dira gaur eta Patxi Bilbaok, emaztegaiaren aitak eta Ipertrolako haundi mandiak, antolatu du ospakizun gala. Festa itzela. «Gaur txerrien antzera, jan, edan eta dantza egitea nahi dut!» Horixe da iristen gonbidatuei egingo dien harrera. Guztiak bertan daudela dirudienean, ordea, Txusa azalduko da aretoan. Gizon gorputzean bizi den emakumea da Txusa eta Imanolen aitaren azken bikotea izan zen hura hil artean. Mireiak gonbidatu du ezkontzara. Emakumea atsegin du eta aukera polita iruditu zaio Imanolek Txusa hobeto ezagutu eta bere aitarena gaindu ahal izateko. Ezuste honek eta beste hainbat sorpresek ospakizuna kolokan jarriko dute. Ezkontza baino Txarriboda emango du.