Hernaniko Udalak kale garbiketaren kudeaketa bereganatuko du datorren maiatzean. Azken urteotan, zerbitzua kanpoko enpresa baten kontratazioaren bidez eskaini izan du Udalak. Lehiaketa bidez egiten da kontratazio hori eta 2010etik hona FCC enpresari esleitu zaio zerbitzua.
2011n, Udal Gobernu berriak konpromisoa hartu zuen kale garbiketa, oinarrizko zerbitzua eta udal konpetentziako zerbitzua den heinean, publifikatzea aztertzeko, hau da, zerbitzua langile eta baliabide publikoekin ematea.
Prozedura, ostera, konplexua da eta lehen pauso garrantzitsua eman berri du aste honetan. Hilaren 7an egindako ezohiko udalbatzarrak gehiengo osoz onartu zuen Udalak zerbitzu hori bereganatzea; EH Bilduren eta Orain Hernaniren aldeko botoekin (11 boto). EAJk eta PSEk zerbitzua publifikatzearen kontra bozkatu dute (6 boto).
Garbitania Sozietate Publikoak kudeatuko du kale garbiketa maiatzetik aurrera. Datozen hilabetotan, beraz, egun Hernaniko kaleak, plazak eta parkeak garbitzen ari diren langileak -egun FCCko langileak- Garbitaniako langile bihurtzeko prozedurak egingo dira. Modu berean, zerbitzua baliabide materialez hornitzeko lanak ere egingo dira.
Kale garbiketa da Hernaniko Udalak egiten duen kontrataziorik garrantzitsuena, diru kopuruari dagokionez. Urtero, 1.152.000 euroko kostua izaten du zerbitzu horrek eta xehetasunak txostenetan jaso ditu.
«Publifikazioaren onurak mota desberdinekoak izango dira: zerbitzuaren eskumena bere gain hartuta, kudeaketa hobeto kontrolatzeko tresnak izango ditu Udalak. Oinarrizko zerbitzu publiko hau ez da merkatuaren menpe egongo eta gardentasuna hobeto bermatu ahalko du Udalak. Era berean, behin publifikatuta, %10eko aurrezpena ekarriko dio Udalari» adierazi zuen Luis Intxauspe alkateak.
«Kale garbiketaren zerbitzua bereganatuta, kalitatezko zerbitzu publikoak eskaintzeko konpromisoan beste urrats bat egin du Udalak, urte hasieran industrialdeetako hondakinen kudeaketa bereganatu ondoren» dio Udal Gobernuak.
EAJ-PNVk eta PSE-EEk zalantzak dituzte argitaratutako zenbakiekin
Oposizioko alderdi nagusiak EAJ-PNV aurka bozkatu zuen eta Andoni Amonarraiz bozeramaileak bere arrazoiak eman zituen. «Hasiera batean kale garbiketaren kudeaketa berreskuratzearen aldekoak gara, baina azken egunetan txosten desberdinak aztertu, irakurri eta beste batzuk eskatu ditugu eta zenbakiek ez dute ematen. Aregitaratu diren datuetan hutsune asko ikusten ditugu eta aldagai asko ez dira sartu. FCCri ere eskatu dizkiogu datu desberdinak eta datu guzti horiek kontutan izanda 1.152.000 euroko kostua Garbitaniarekin haundiagoa litzateke. Aurreztu egingo dela esaten du Udal Gobernuak, baina gure datuen arabera 1.210.000 euroko kostua izango duela ateratzen zaigu. Gutxi gora behera 100 mila euro garestiagoa izango litzateke».
Ildo beretik PSE-EEk ere aurkako botua eman zuen. «Guri ere ez zaizkigu kontuak ateratzen» esan zuen Ricardo Crespo bozeramaileak. «Sindikatuekin bildu gara eta langileen egoera hobea izango dela esan digute. Alde horretatik zoriondu egin behar dugu Udal Gobernua, baina bestetik, zenbakiak zalantza asko sortzen dizkigute. Errealitatetik kanpo daudela uste dugu».
Orain Hernaniko bi zinegotziek aldeko bozka eman zuten. Jaione Aristregik esan zuen «zebitzuak Udalak berreskuratzearen alde gaude. Hau pausu bat da eta azkena ez izatea espero dugu».