Europan barrena dabil, eliza batetik bestera, Lampedusako gurutzea; patera puskekin egindako gurutzea, hain justu. Eta Hernanitik ere pasako da, datorren asteazkenean, martxoaren 14an.
Horregatik, gurutzearen aurrean otoitz eta gogoeta egiteko topaketa antolatu du Hernaniko Parrokiarteak: asteazkenean bertan, arratsaldeko 19:30etan San Joan Bataiatzailea parrokian. Bertan hitz egingo dute, errefuxiatuen eta etorkinen eskubideen alde ari diren hainbat ekintzailek, «haien errealitate gordinaz jabetu gaitezen», azaldu dute.
Hernanitik pasa ondoren, Gipuzkoa osoa zeharkatuko du Lampedusako gurutzeak, eta Arantzazuko igoerarekin bukatuko du bere ibilbidea, Erramu bezperan.
Barkamen sakramentua, hurrengo astean
Beste zenbait zita ere jarri ditu Hernaniko Parrokiarteak, hurrengo asterako: Elkarteko Barkamen Sakramentua ospatuko dute, herriko elizetan.
Martxoaren 19an, astelehenarekin, San Joan Bataiatzailea parrokian egingo dute, arratsaldeko 19:30etan. Asteartean, martxoaren 20an, berriz, Floridako San Jose Langilean izango da, arratsaldeko 19:00etan. Eta asteazkenean, hilaren 21ean, Ereñotzuko San Antonio elizan izango da Elkarteko Barkamen sakramentua, arratsaldeko 19:00etan hori ere.