Chicagoko Moody Simphonic Bandek kontzertua eskainiko du etzi, larunbatean, arratsaldeko 19:30etan, Milagrosan. Kontzertu bira egiten ari dira, eta azken momentuan Hernanira ekartzeko aukera sortu da eta bertan joko dituzte beraien doinuak espainiar musikari gazte talde batekin batera.
Moody Unibertsitateko banda sinfonikoa, 1970ean sortua da, AEBn, Illinoisen, eta Chicagoko Moody (MBI) Unibertsitateko zenbait fakultatetako hainbat ikaslek osatzen dute. David Gauger tronpetista da zuzendaria eta soinu bandak eta lan klasikoak jotzen dituzte. Kristau eliza ebanjelikoak antolatu du kontzertua.
Txistulariak, igandean
Txistulari Bandak kontzertua eskainiko du igandean, 13:00etan. Kontzertua kalez kale eskainiko da eta euria eginez gero Udaletxeko arkupeetan izango da. Irteera Plazatik izango da eta bi tronpeta-joleen laguntza izango dute. Kalejiran abiatu eta puntu desberdinetan gelditu eta doinu batzuk joko dituzte: Alkate soinua, Behin batean Loiolan, Goazen mendirik mendi (zortzikoa), Itsasoan urak handik dire, Molinatxo (habanera), Tantanbiruntena, Triste bizi naiz eta, Txakur txiki gorritxo bat, Txurkoene (baltsa), El cantarico.
Andoaingo Piano Jaialdian hernaniar ugari
Urtero bezala Hernani Musika-eskolako ikasleek parte hartu dute 13. Andoaingo Piano Jaialdian. Ederki moldatu ziren hernaniarrak eta Amaiera Kontzertuan sei hernaniar egon ziren, lortutako aipamen bereziei esker. Ohore hori izan dutenak: Sara Andrés, Unai Estevez, Ander Olasagarre, Joseba Pacheco, Auritz Txintxurreta eta Alicia Maiza dira. Joseba Kortak aurten jarritako sari berezia, Debussy saria, irabazi du.