Pasa den asteburuan hasi zuten errepideko denboraldia, txirrindulari guztiek, eta astigartarrek galtza bete lan daukate.
Gaur, 16:30etan, Errenteriako Sari Nagusia jokatuko dute alebin eta infantilek Alamedako zirkuituan, eta juniorrak, XXXIX. Errenteria Hiria Sarian izango dira bihar, Gaintxurizketan barrena hiru buelta eginez, 78km-tan zehar.
Urko Semperenak, berriz, Aiztondoko XV. Klasika jokatuko du bihar; Espainiako Koparako proba puntuagarria izango da, eta openetako txirrindulari onenak ariko dira lehian, 141km-tako ibilbidea eta mendiko sarirako 8 mendate puntuagarri dituen lasterketan.
Astigartarrak, 4 lasterketetan
Lehengo asteburuko probei dagokienez, hasiera polita eman zioten herriko astigartarrek denboraldiari.
Elite eta 23 urtez azpikoak Zumaiako X. Sarian aritu ziren; Urko Semperena tarteko, Eibar Hiria Energia taldearekin, eta hain zuzen, talde lanari esker, Onditz Urruzmendi kidea izan zen lider.
XLI. Ibaeta Sarian, berriz, Jaime Romero eta Enekoitz Azparren kadete astigartarrak izan ziren, Bazpi eta Caja-Rural Ikolan taldeekin, hurrenez hurren, eta sailkapena gaindituta, finala jokatu zuten; 9 eta 11garren egin zuten.
Infantilei dagokienez, Aketza Bolado, Tasio Semperena eta Aimar Olasagastik hartu zuten parte Hondarribiako proban. Tasiok indartsuenak harritu nahi izan zituen, hirugarren bueltan erasora jota, baina ahalegina garesti atera zitzaion, eta pelotoitik urrundu zen. Aketzak harrapatu zuen gero, eta bien arteko sprint polita jokatu zuten; Aketzak irabazi zuen.
Txirrindulari astigartarrek, guztira 13k, hasi dute errepideko denboraldia.
Alebinek ere Hondarribiako proba bera jokatu zuten, eta bertan aritu ziren hainbat astigartar: Unax Aranburu, Aimar Capdequi, Unai Hernandez, Adur Olano, Ekhi Romero eta Aimar Zabala. Lan ederra egin zuten, eta Aimar Capdequi izan zen sailkapen onena lortu zuena; 20garrena izan zen. Hala ere, txalo zaparrada ederra jaso zuen Unai Hernandezek ere. Izan ere, gurpila harriarekin jota, erorikoa izan zuen, baina jakin zuen aurrera egiten.
Azkenik, juniorretan, Telmo Semperena Eibarko XLI. Udaberri Memorialean aritu zen igandean. 78 kilometroak egiten protagonismoa hartzeko saiakera egin zuen Telmok, parte hartzen ari ziren 86 txirrindulariren artean. Baina pelotoiak ez zion aukerarik eman. Azkenean, Ibon Alday arabarra izan zen garaile, eta Telmo 17garren izan zen.