Bihar eskainiko du urteko aurreneko kontzertua, ‘Hernani’ Musika Eskola Publikoko txistulari taldeak; orain izen berriarekin: Leokadisti Txistulari Taldea.
«Taldeari izena jarri behar, eta nola ez gogoratu Leokadisti etxearekin? Hernaniri hainbeste txistulari on eman dizkion etxearekin, gainera guk astero entsaiatzen dugunetik hain metro gutxira egonda? Ansorenatarren jaiotetxearen izena hartu dugu, bai, XIX. mendetik gaur arte txistua Euskal Herri osora zabaldu duen etxearena», azaldu dute.
Hori horrela, bihar eskainiko dute aurreneko kontzertua, Leokadisti izenarekin. Udaletxeko arkupeetan izango da, eguerdiko 12:30etan hasita.
Doinu klasikoak, eta Eskozia eta Irlandako doinu bana
Hamahiru piezako erreportorioa eskainiko dute, eta ohiko moduan, joko dituzte txistularien errepertorioko doinu klasikoak, batetik; dantza doinuak, bestetik; eta azkenik, beste errepertorio batzuetatik hartutako bitxikeriaren bat. Oraingoan, Eskozia eta Irlandako doinu bana aukeratu dute, kontzerturako: Cumberland Reel eskoziarra, eta The 17th of July irlandarra.