70 urte beteko dira bihar Lanbide Heziketa Eskolak (garai hartan EPO zenak) ateak ireki zituenetik; hain zuzen, 1948ko martxoaren 1ean eman zituen aurreneko eskolak. Bertan izan ziren Eusebio Muñoa, Martin Zugasti eta Juan Mari Navarro ikasle bezala, eta Juan Cruz Etxeandia eta Eduardo Manzanedo irakasle gisa; hori dela eta omenalditxoa jasoko dute bihar, eguerdiko 12:30etatik aurrera, Hernani Lanbide Heziketako Institutuan, Karmelo Labakan.
Karmelo Labakak, sortua
Garai hartan herriko parrokoa zen Karmelo Labaka izan zen Lanbide Heziketa Eskolaren aurreneko hazia jarri zuena: «bere helburua izan zen Hernanin bertan lan irtenbidea eskaintzea jendeari. Garai hartan, Donostiara joaten baitziren», azaltzen du egungo irakasle batek.
Eta aurreneko pauso horretan, Eusebio Muñoa eta Martin Zugasti izan ziren aurreneko promozioa osatu zuetenetako bi. Hamalau izan ziren hasiera batean, eta hurrengo urtean beste bat gehitu zitzaien; denera, 15 ikaslek bukatu zituzten mekanika ikasketak. Horietatik, hiru besterik ez dira geratzen: Zugasti, Muñoa eta Juan Mari Navarro.
«Sorpresaz» hartutako omenaldia
Hirurak izango dira biharko omenalditxoan. Muñoa eta Zugastirekin hitz egiteko aukera izan du Kronikak, eta omenaldia «sorpresaz eta ezustean» harrapatu diela onartu dute: «ez genuen uste gurekin gogoratuko zirenik!».
Ederki gogoratzen dituzte garai hartako kontuak, baita lan egiteko moduak ere. Egungo moduekin asko aldatu omen dira: «lehen dena eskuz egiten zen; orain, botoiari ematen diozu, eta berak egiten du dena», onartzen du Martin Zugastik.
Egungo gazteak bezalaxe, Alemaniara joan behar izan zuen Zugastik lan bila: «bi urte pasa nituen Westfalenen. Gero honera etorri eta Martin Zugasti kaldereria sortu nuen».
Muñoa, aldiz, Lanbide Heziketa Eskolako irakasle izan zen: «39 urte eman nituen; horietatik 7 eraikin zaharrean, eta 32 Karmelo Labakan».
AURRENEKO PROMOZIOA
Antonio Amonarraiz Echeverria
José Ramón Claraco Alonso
José Erdocia Arregui
Antonio Errazquin Beldarrain
José Luis González Tormez
Francisco Gorospe Pascual
Juan Martin Larumbe Macazaga
José Luis Maidagán Azpiazu (*)
Eusebio Muñoa Rekondo
Juan Mari Navarro Aranalde
Javier Rodríguez Pérez de Arrilucea
Arturo Rodríguez Ruíz
Ignacio Sarriegui Lizaribar
Alberto Zapirain Expósito
Martin Zugasti Eguren
*Urtebete beranduago hasi zen