Ez du huts eginen aurten ere, Goizutrail mendi lasterketak. Eta dagoeneko jarri diote eguna antolatzaileek, probaren bosgarren edizioari: maiatzaren 19an izanen da, larunbatarekin.
Hiru hilabete eta erdi falta dira zitarako; nahikoa denbora badute korrikalariek, beraz, lasterketa prestatzeko.
Aurreko urteotan bezala, bi ibilbide
Bakoitzak aukeratuko du bere distantzia, gainera. Izan ere, aurreko edizioetan bezala, bi ibilbide izanen dira aukeran: bat motzagoa, 10 kilometrokoa, Eneko Elorrira igo eta herrira jaitsiko dena bueltan; eta bestea luzeagoa, 25 kilometro dituena, aurreneko zati hori osatu ondoren Mandoegira ere igoko dena.
Ibilbideak bezala, data ere mantendu dute antolatzaileek, eta beraz, aurten ere, Zegama-Aizkorri mendi lasterketa ezagunaren aurreko asteburuan izanen da.
Izenemateak laster, Herrikrosan
Behin data zehaztuta, berehala zabalduko dute izena emateko epea ere. Internet bidez eginen da, www.herrikrosa.eus web orrian, aurreko urteotan bezala. Laster izanen da apuntatzeko aukera, datorren astetik beharbada.
Gero, dortsalik geratuko balitz, lasterketaren egunean ere izango da aukera, azken orduko izenemateak egiteko.
Joan den urtean, maila haundia izan zuen lasterketak. Aitziber Ibarbia eta Jon Alberdi nagusitu ziren ibilbide luzean, eta Ana Rodriguez eta Iñigo Alzola motzean.