Hernaniko Udaleko Enpresa Batzordeak jakinarazi du ELA eta LAB sindikatuek biharko deitu duten 4 orduko lanuztearekin bat egingo dutela, Langileen Batzarrak hala erabakita.
«Egoera salatu nahi dugu»
Deialdia Udal eta Foru Aldundietara zabaldu dute sindikatuek, bertako egoera salatzeko: «azken urteotan lanpostu ugari galdu da Udal eta Foru administrazioan. Hutsik geratu diren lanpostuak bete gabe eta zerbitzu osoak pribatizatuz».
Gainera, diotenez, «betetzen diren lanpostuak, behin behineko langilez betetzen dira. Eremu publiko honetako langileen %36 behin-behinekotasun egoeran dago; EUDELek berak aitortzen duenez, Udalhitz hitzarmenak behin-behinekotasuna gehienez ere %6ra mugatzen duenean».
Hain zuzen, hitzarmen hori «2008.urtean sinatu zen azken aldiz, 2008-2010 urteetarako. Hala ere, 2018an bete gabe dago eta gainera, gure instituzioek ez dute berau betetzeko inolako borondaterik erakusten», salatzen dute.
Era berean diote: «ez dago benetako Negoziazio Kolektiborik sektorean».
Horren aurrean, ELAk eta LABek dei egin diete erakundeei: «ildo propio bat jorratzeko, herritarroi ematen zaizkigun zerbitzu publikoak bermatzeko».