Urumea ibaiak gainezka egin, eta urak hartu zuen Landareko zelaia, asteartean. Horrek zalantzan jarri zuen, gaurko partidua Hernanin jokatu ote zuten trikoloreek, Ohorezko Mailan. Baina gogor aritu dira lanean, egun hauetan, taldeko kideak eta jokalariak, eta lortu dute zelaia bere onera ekartzea. Horrela, ostiralean konfirmatu zen notizia: Landaren jokatuko du Hernanik, Alcobendasen kontra.
Eguerdiko 12:00etan izango da, eta beste behin, zaleen bultzada jasoko dute trikoloreek, partidu zail bat irabazten saiatzeko. Izan ere, hirugarren sailkatua etorriko da bisitan.
Geldialditik bueltan, puntu beharrez
Baina zailtasunak zailtasun, aukera guztiak aprobetxatu beharra daukate trikoloreek, mailari eusteko borrokan bete-betean sartuta baitaude: azkenaurreko postuan daude, 24 punturekin, La Vila 10garrenak bezala. Getxo, berriz, 11 punturekin dago, urruti oraindik, atzo Ordiziaren kontra galdu ondoren. Eta sailkapenean hernaniarren aurretik, Cisneros dago 9garren, 29 punturekin.
Azkeneko bi partiduak aurkari zuzenen kontra galdu ondoren, erreakzionatu beharra daukate trikoloreek. Aurreneko aukera, gaur bertan.