Azken lau partiduetan hiru berdinketa eta porrot bat jasan ondoren Mundarro garaipen gosez irtengo da gaur Urnietako zelaira, 18:00etan. Urnietaren aurka jokatuko du eta hiru puntuak eskuratu nahi ditu aurkari zuzen baten kontra. Astigartarrak hamargarren daude kokatuta 24 punturekin eta urnietarrak hamaikagarrenak dira 23rekin.
Oraindik hamar partidu geratzen dira denboraldia amaitzeko eta bi taldeen helburu nagusia momentu honetan beheko postuen mamua aldentzea da. Zazpigarren postua gertu dute, baina baita azken hirurak ere. Horrexegatik lehia estua espero da oso gertu dauden bi herrien arteko partiduan.
Puntu gazi gozoa azken sailkatuaren kontra
Inauterien ondoren konpetiziora itzuli zen pasa den larunbatean eta Mundarrok berdinketa lortu zuen Oiartzunen Zarkumendegin. Kontuan izanik oiartzuarrak azkenak direla sailkapenean, banako berdinketak zapore garratza izan zuen Mundarrorentzat. Pasadizo aipagarriena etxekoek bere ohiko kamiseta aldatu behar izana izan zen. Gaur Urnietan zapore hori gozo bihurtzen saiatuko dira.