Tratu Onen Mapa egitasmoa abiarazi zuen aurreko urtean Arremanitz Kooperatibak, eta gaur emango du ezagutzera ofizialki. Pintxo-tertulia moduan egingo dute gaur, goizeko 10:00etatik eguerdiko 13:30ak bitarte, Biteri kultur etxean.
Iaztik, bederatzi eragile
Iaz jarri zuten egitasmoa martxan: «egitasmo honekin Tratu Onen Kultura zabaldu nahi genuen herri mailan». Eta horretarako, hain zuzen, hasierako eragile batzuk aukeratu zituzten, «Hernani bizitzeko leku on bat izateko jada egiten diren lan asko ikusaraziz».
Bederatzi izan dira hasiera batean, eta hemendik aurrera, gaurko aurkezpenarekin, gehiago izatea nahi dute. Honen helburua da «bide hau ezagutzera ematea eta herriari parte-hartzea irekitzea».
Eta horretarako, ekitaldi konpletoa izango da: egitasmoa bera eta bertan parte hartzen dugunon aurkezpena egingo dugu; Tratu Onen Mapa fisikoaren aurkezpena ere egingo dugu; eta denon artean hemendik aurrerako urratsak definitze aldera pintxo-tertulia egingo dugu».
Bertan izango dira, beraz, aurreneko fasean parte hartu duten bederatzi eragileak: Kronika bera, Hernaniko Gaztelekua, Berdintasun Kontseilua, Kanika Aisialdi Taldea, Pausoka Elkartea, Amher Elkartea, Hernaniko Hezkuntza Plataforma, BiziOn eta Bilgune Feminista.
Denak, herritarrak zein dagoeneko parte-hartu duten eragileen ordezkariak elkartuko ditu gaur goizean Arremanitz Kooperatibak. Izan ere, «eztabaidagune kolektibo bat eraikitzea oso garrantzitsua» iruditzen zaie. Eta hori goxatzeko, zein hobeto, patata tortila pintxoak baino? Beraien ustez, horrela «ekarpenak egitea ere, Tratu Onen Kulturaren parte delako».
«Orain arteko prozesua eragile zehatz batzuekin aurrera eraman izan dugu»
Proba txikia, aurrenekoa
Gaur hasiko dutena Tratu Onen egitasmoa herriari zabaltzeko aurreneko aukera izango da: «orain arteko prozesua eragile zehatz batzuekin aurrera eraman izan dugu; herriari aurkeztu aurretik proba txiki bat egin nahi genuelako. Baina gaurtik aurrera edozein herritarrek parte hartu dezake norbere dekalogo eta konpromiso propioak aportatuz. Eragileekin aldiz, zuhurrago jokatu nahi dugu; prozesua gehiago finduz», onartu dute.
Horrela, beraz, egitasmoa ezagutu nahi duenak hitzordua dauka gaur, goizeko 10:00etan hasita, Biterin.