Urteko egun berezienetakoa izan ohi da Zuhaitz Eguna, herriko gaztetxoentzat eta beren familientzat. Eta hain justu, gaur izango dute jardunaldi horrekin gozatzeko aukera, 54garren aldiz.
Beste urte batez, Aparrain mendian, Udalaren jabegotza diren lurretan, izango dute zita, goizeko 09:30ak aldera.
12:30ak aldera egingo dute buelta, Hernanira.
400 pago
Azkeneko urteetan bezalaxe, pagoak izango dira gehien landatuko dituzten zuhaixkak. Aurten, hain zuzen, 400 pago izango dira Aparrainen gaztetxoenek landatuko dituztenak.
Oinez edo autobusez, baina umore onez
Eta horietako bat landatu nahi duenak, gaur Aparrainera joan besterik ez du. Bertaratzeko, bi aukera izango dira, urtero bezala.
Oinez atera nahi duenak, aukera paregabea izango du eguraldi ederraz gozatzeko. Horretarako, goizeko 07:30etan jarri dute zita Plazan.
Autobusez joan nahi duenak, aldiz, bi aukera izango ditu: Atsegindegitik aterako da autobusa, Biteri ondoko geltokitik, 09:00etan, eta bost minutu beranduago, egingo du geldialdia Ereñotzun.
Denek bat egingo dute Ugaldetxon Aparrainera igotzeko. Iritsi bezain laster hasiko dira zuhaitzak landatzen; ondoren, hamaiketakoa egitera jaitsiko dira atsedenlekura, eta 12:30etan egingo dute buelta, berriz ere herrira.