Aste honetan hasi berri dira Etxeberri auzoko urbanizazioaren bigarren faseari dagozkion obra-lanak. Abuztura arte luzatzea aurreikusi du Udalak, eta bitarte horretan, hainbat aldaketa jasango dituzte auzoko bizilagunek.
Udalaren zerbitzuak berritzea, helburu
Lan hauen helburua izango da, batik bat, Udalaren jabetzakoak diren azpiegiturak edo «udal zerbitzuetako sareak berritzea, hau da, ur hornidura, eta saneamendu eta argiteri sareak (kaleko argiztapena barne)». Era berean, Udalarenak diren espaloiak «zabaldu eta berrituko» dira. Horrela, bada, irisgarritasuna hobetuko dela diote Udaletik.
Bi azpifase
Hortaz, hori guztia egiteko, bi azpifase izango dituen lanak gauzatuko dituzte. Aurrene-koa da hasi berri dutena; «obra horrek 5-7 bitarteko blokeen eremua, auzoaren goiko eremua (1-3 bitarteko blokeak) eta auzoko errepidearen ezkerreko espaloia eta hegoaldeko oinezkoen eremua hartzen ditu», azaldu dute.
Azpifase honetako lanek sei hilabete iraungo dutela aurreikusi dute: «obraren lehenengo zatian (hiru hilabetez) 5. blokean hasiko dira eta gero 7. eta 6. hartuko dituzte. Horiek bukatuta, 1, 2 eta 3. blokeen goiko eremua egingo da lehenengoz eta gero auzoko errepidearen ezkerreko zatiarekin jarraituko dute. Hegoaldeko oinezkoen eremuaren berritze lanek osatuko dute obra. Horrek beste hiru hilabete irautea aurreikusten da».
Bigarren fasea jarraian egingo dute, «1-3 blokeen beheko eremua eta 7. blokearen arrapala, espaloia eta eskailerak».
AMR lantegiko aparkalekua, bizilagunentzat
Bizilagunen trabak leuntze aldera, Foru Aldundiarekin sinatu du hitzarmena Udalak bizilagunek AMR lantegia zeneko aparkalekua erabili dezaten.