Etenik gabe eta asko ari zen euria egiten, azken egunotan; eta Urumea ibaiak gainezka egin zuen atzo goizean. Urak atera ziren, Hernaniko eta bailarako zenbait tokitan. Landareko zelaia urez beteta ageri zen, Floridako tunela itxita, Ergobian ere atera ziren urak...
Ereñotzun, ibaiak goizeko 10:00etan izan zuen maila altuena: 1,88 metrora iritsi zen. Hortik aurrera, behera egin zuen pixkanaka, prezipitazioak ere gutxitzearekin batera: 1,7 metro inguruan zegoen, atzo azkeneko orduan. Eta espero da, joera hori izatea, gaur ere. Atertzera egingo du eguraldiak, eta Urumea ibaia ere, bere onera bueltatuz joango da, pixkanaka pixkanaka.
Landaren jokatzeko esperantza, errugbi taldeak
Erabat inundatuta geratu zen Landare goizean, baina pixkanaka hustuz joan zen gero. Eta Hernani errugbi taldeak, badauka esperantza, igandeko partidua Landaren jokatzeko. Urarekin batera, zikinkeria ere sartu ote den arabera izango da hori. Hala bada, ez die denborarik emango, garbitzeko.