Ohorezko izendapenen arautegia zaharkituegia zegoenez, Udalak eguneraketari ekin zion azaroko plenoan. EH Bilduk hamaika alegazio aurkeztu dizkio aldaketari, «batik bat, herritarren parte hartzea sustatzeko helburuarekin».
Udal Osoko Bilkurak egiten dituen ohorezko izendapenek herritarren babes minimo bat izan dezatela eskatu du EH Bilduk, ez baitio zentzurik ikusten osoko bilkura osatzen duten hamahiru pertsonen erabakimenera mugatzea herriko seme edo alaba kuttun edo ohorezko seme edo alaben izendapenak egitea.
Horregatik, proposamena udaletik atera eta hain garrantzizko izendapen bat herritarrekin konpartitua izango dela bermatzeko, izendapen horrek herritarren %10eko babesa izateko prozedura abiatzea proposatu du.
Bestalde, herritarrek ere proposamenak egiteko aukera izan dezaten proposatu du EH Bilduk. Hau da, izendapen proposamen batek herritarren %20aren babesa jasoko balu, Udal Osoko Bilkurak hori onartu behar izatea planteatu du EH Bilduk.
Azkenik, EH Bilduk urtero kirolean, kulturan, euskaran, literaturan… herritarrei sariak emateko aukera aztertzea eskatu du, herrian dauden herritar anonimo guztiei eta euren lanei oihartzuna eman ahal izateko. Horretarako, EH Bilduk urtero hautagaiak aurkezteko epea zabaltzea eta ondoren, hautagairik balego, herritarrek saria merezi duena aukeratzea proposatu du EH Bilduk.
Emendakin hauekin guztiekin, EH Bilduk parte hartzearekiko duen konpromisoan sakontzen du, parte hartzea, edozein jardun politikoren oinarri izan behar duela argi baitu EH Bilduk.