Hirugarren proiektua jarri dute martxan, Txertatu Merkatuan proiektuaren baitan. Eta oraingoan, kutxazain eta apal-betetzaileen prestakuntza eskainiko die, 16-29 urte bitarteko gazteei. Guztira, 14 gaztek hartu ahal izango dute parte, langabezian daudenak, ikasten ari ez direnak, eta kualifikazio gutxikoak; eta prestakuntzaren ondoren, 100 orduko praktikak burutuko dituzte.
Beterri-Buruntza eskualdeko gazteei, lan munduan sartzen laguntzen dien programa da Txertatu Merkatuan; Hernani, Astigarraga, Andoain, Urnieta, Usurbil eta Lasarte-Oriako gazteei, hain justu.
Izenematea, ostiralera arte
Hirugarren proiektu hau, martxoan hasiko da, eta ekainera arte iraungo du. Horregatik, parte hartu nahi dutenek, egun hauetan daukate izena eman beharra: ostirala izango da azkeneko eguna, apuntatzeko. Horretarako, Urigain etxera jo behar da (La Salle etorbidea 6, Andoain), goizeko 09:00etatik 15:00etara. Izena emateko garaian, lehentasuna izango dute eskualdeko emakumeek.
Proiektuari buruzko informazio gehiago jasotzeko, bestalde, bi bide jarri dituzte aukeran: 943 30 42 21 telefonora deitu, edo txertatumerkatuan@andoain.eus helbidera idatzi. Cebanc prestakuntza zentroak emango du formakuntza: gizarte eta lan orientazio eta integraziorako teknikak, kutxazain eta apal-betetzaileen prestakuntza, eta praktikak burutzeko beharrezkoa.