Azaroan eta abenduan burutu zuten, Hernaniko EH Bilduk sustatuta, txotx garaiari buruzko hausnarketa prozesua, «herrian sortzen dituen iritziak hobeto ezagutu eta denon artean konponbideak proposatzeko asmotan». Eta prozesuak emandakoaren inguruan, balorazioa egin du EH Bilduk: «txotx garaian inplikatuta dauden eragileek eta herritarrek egindako ekarpenak, Udal Gobernuari eman dizkiogu. Horietako batzuk, aurten jarriko ditu martxan Udalak, eta beste batzuk aztertzen ari da», azaldu dute prentsa ohar bidez.
Zer da txotx garaia zuretzat? galderatik abiatuta, girotze fasean bi bideo plazaratu zituzten, prozesuaren berri emanez eta herrian txotxaren inguruan dauden ikuspuntu ezberdinak azaleratuz. «Horrekin batera, eratu genuen talde motorra, txotx denboraldiarekin inplikazio zuzena duten kolektiboetako kideekin: Kaxkoko hiru herritar, sagardogileen ordezkari bat eta tabernari bat; eta haiekin batera, EH Bilduko hiru ordezkari», azaldu dute.
Diagnostikoa eginda, etorkizunerako ideiak
Galdetegi bat ere luzatu zien EH Bilduk herritarrei, paperean eta interneten, txotx garaia hobetzeko ekarpenak jasotzeko; «635 erantzun jaso genituen», jakinarazi dute. Eta galdetegiarekin batera, bi saio ireki egin zituzten, «erpin guztiak bildu nahian». Horrela, behin diagnostikoa eginda, etorkizunerako proposamenak jaso zituzten: «beharren artean aipatuenak izan ziren, Udaltzaingoaren presentzia areagotzea eta jarraipena zorroztea, eta sexu erasoen aurrean protokoloaren gauzatzea erraztea. Horretarako, informazioa jaso eta istilu eta sexu erasoen kasuetan salaketak jartzeko, kalean gune berezi bat jartzea proposatu zen. Hernanik duen irudia aldatzeko (araurik gabeko herria), komunikazio kanpaina bat abiatzea ere izan zen aipatuenetakoa, epe laburreko lanen artean».
Proposamen horien emaitza aurkeztu dio EH Bilduk Udal Gobernuari, eta honek «konpromisoa hartu du, pixkanaka pixkanaka neurriak gauzatzeko», azaldu dute. «Prozesuaren balorazio oso positiboa egiten dugu. Txotx denboraldiaren irudi katastrofikoaren iruditik aldenduta, erpin ugari dituen fenomenoa dela ondorioztatu da. Gainera, iritzi desberdinen trukaketa ahalbidetu eta eragile edota kolektibo bakoitzak, lehendik zeukan iritziaz gain, besteen ikuspuntuak ezagutu eta lantzeko aukera eskaini du», nabarmendu du EH Bilduk.