Aparrainen batzuk eta sagardotegien bidean besteak, urteroko bi zitaren bueltan elkartuko dira hernaniarrak, larunbat honetan: Zuhaitz Eguna eta Sagar Lasterra.
54garren edizioa izango du aurtengoa, Zuhaitz Egunak. Aparrainen egingo dute landaketa, eta aurten, 400 pago berri landatuko dituzte. Bertara joateko, oinez abiatuko dira helduak, 07:30etan Plazatik, eta autobusean joango dira haur eta gaztetxoak, 09:00etan Atsegindegitik aterata, Biteri ondotik; Ereñotzun egingo du geldialdia autobusak, 09:05etan.
Haur eta heldu, Ugaldetxon elkartuko dira, Aparrainera elkarrekin igotzeko, zuhaitzak landatzera. Hamaiketakoa egitera jaitsiko dira Aparraingo atsedenlekura, eta 12:30etan egingo dute buelta, herrira.
Sagar Lasterra, Ibarluzetik
Goizeko 11:00etan abiatuko da, bere aldetik, Sagar Lasterra herri lasterketa. Sagardotegien bidetik, 9,8 kilometroko ibilbide gorabeheratsua osatuko dute korrikalariek, Ave Maria parkera arte. Irteerara joateko, doako autobusa jarriko dute, kiroldegi ondotik, eta arropa jasotzeko zerbitzua egongo da.
Izena emateko epea, zabalik dago oraindik, internet bidez, www.kirolprobak.com webgunean: txip horia dutenek 9 euro, ez dutenek 11 euro. Egunean bertan ere izango da aukera, azkeneko momentuko izenemateak egiteko, 09:00etatik 10:30etara kiroldegi ondoan.