Proiektu berritzailea bezain garrantzitsua jarri dute abian Erroak Elkarteak eta Hernaniko Udaleko Gizarte Zerbitzuek ikasturte honetan, eta duela pare bat aste egin zuten ofizial, hitzarmen batekin.
Elkarlan horri esker, aurreko urritik hasi eta ikasturte bukaerara arte, Hernaniko emakume talde bat Joskintza sortzailea eta eskulanen tailerrean ari da parte-hartzen, Erroak elkartearen eskutik.
Sendotu Aldiberean programa, oinarri
Dena den, elkarlana ez da nolanahi hasi. Alde batetik, Sendotu Aldiberean programa dago oinarrian, Erroak Elkarteko arduradun batek azaldu bezala: «Euskal Autonomia Erkidegoko zazpi elkartek bultzatutako proiektua da: Caritas, Agiantza, Peñascal Fundazioa eta Sartu Taldea osatzen dugun lau elkarteak, hau da, Zabaltzen, Gaztaroa, Sartu Araba eta Erroak Gipuzkoan. Eta helburua zen Europako Gizarte Funtsaren 2014-2020 ekintza-planean sartzea; horrek planteatzen dituen helburuak aurrera eramateko: zailtasunak dituztenei laguntzea lan merkatuan txertatzen, lanaren kalitatea hobetzea, eta zailtasun gehien dauzkatenei gizarteratze eta laneratze-prozesuak erraztea».
Zentzu horretan, Erroak elkarteak bi bidetan egiten du lan, eta horietako batean kokatu du Hernaniko proiektua: «gizarteratzeko ibilbideekin lotura daukaten jarduerak egitea da Erroaken lanetako bat: programak, proiektuak, tailerrak... dira, eta horiekin lortu nahi dena da zailtasun soziopertsonalak lantzeko espazioaren sorrera erraztea».
Emakume taldearen eskaera
Bestetik, garrantzia nabarmena izan zuen, eta kasu honetan oso erabakigarria izan da, Erroakeko arduradunaren ustez, eskaera emakumeek beraiek egin izana: «Hernaniko Zerbitzu Sozialekin harremana zuen emakume talde batek behar konkretu bat azaleratu zuen: txoko bat sortzearena, elkartu ahal izateko eta jarduera konkretu bat egiteko, joskintza».
Momentu horretan egin zuten bat bi proiektuek; izan ere, Erroak Elkarteak aukera ikusi zuen, Sendotu Aldiberean proiektuaren bitartez, jarduera hori aurrera eramateko.
Horrela bada hasi ziren elkartzen urrian; astean hiru aldiz izaten dute saioa, Urumea ikastola zaharreko eraikinean.
Joskintzak, erabilera bikoitza
Kasu honetan, gaiaren aukeraketa oso erraza izan zela onartzen dute tailerra koordinatzen dutenek: «gaia interesa agertu zuten emakumeek beraiek planteatu zuten; azken finean, bere nahia jasotzea ere garrantzitsua da». Horrez gain, Erroak Elkartetik erraz onartu zuten, bi ikuspuntu izan ditzakeelako: «profesionala eta okupazionala, hau da, lanerako baliagarria izan daiteke, baina baita etxean, modu pertsonalean, konponketa batzuk egiteko ere».
Gai gehiago, tailerrean
Dena den, formazioaren alorrean tailer okupazionala deritzona da Hernanin Erroak Elkarteak egiten duena: «emakumeak trebatzen ditu joskintzaren bueltan oinarrizko lanak egiteko, baina ez da joskintza tailer bat besterik gabe, oso garrantzitsua da emakumeen parte-hartzea, beraiek sortutako espazio bat izatea».
Izan ere, horrek ahalbide-tzen du beste gai batzuk jorratzeko aukera, besteak beste, heziketa gaiak lantzeko aukera, gehiengoak seme-alabak baititu; elikadura gaiak, arreta pertsonala... Hau da, «ahalduntze- eta garapen pertsonalerako espazio bat izan behar du».
«Orokortasun batean, lan karga haundia daukaten emakumeak dira, seme-alaba askoko familia daukatenak»
Etxetik ateratzeko, aukera bat
Modu orokor batean, etxeko egoerak baldintzatzen dituen emakumeak dira: «orokortasun batean, lan karga haundia daukaten emakumeak dira, seme-alaba askoko familiak dauzkate, eta beraien figura oso garrantzitsua da horietan». Orain arte, beraientzat «oso zaila izan da etxetik kanpoko planak egitea». Hortaz, tailerra aurrerapauso gisa ikusten dute Erroak Elkartetik.
Dena den, hori aurrerago ikusi beharko dela onartzen dute: «oso ibilbide motza daukagu oraindik, urrian hasi ginen eta orain formalizatu dugu hitzarmena Udalarekin. Zerbitzu Sozialen patronatuak eta Erroakek argi ikusi genuen jarraipena eman behar zitzaiola hiru hilabetetako lan honi, eta emakumeek beraiek ere hala ikusten dute. Hori adierazle ona da, emakumeek beraiek espazio hau edukitzen jarraitu nahi izatea».
Hernanin, aurreneko proiektua
Donostian dauzka bi egoitzak Erroak Elkarteak, bata, Martuteneko 27. poligonoan, eta bestea, Amarako Bizkaia pasealekuan. Horregatik, Donostian dauka eragin gehiena, baina Gipuzkoako elkartea izanda, lurraldean zehar zabaltzea da beren nahia. Eta lan horretan, aurreneko pausoa da Hernanin proiektu hau aurrera eramatea.
Hala ere, hernaniarrekin lan egindakoa da, lan formazioa, aholkularitzan eta gizarteratze arloetan. 2017ko behin behineko datuek adierazten duten bezalaxe, 1400 bat gipuzkoar lagundu zituen Erroak Elkarteak urte osoan zehar.
Horietatik, 100 lagun inguru izan ziren hernaniarrak, horrek esan nahi du %5-6a bertakoak zirela. Erdia baino gehiago, formazio prozesuetan aritu dira; eta %20-25a, bakarkako laguntza eta aholkularitzan.