Sagardotegi denboraldia Hernanira iritsi dela-eta, prentsa oharra bidali du Sagar Moreak, Hernaniko txotx denboraldiko asanblada feministak.
Datozen egun eta hilabeteetan egingo dituen hainbat ekintzaren berri eman du, eta dei egin die «sagardotegietara eta Hernaniko jai girora zatozten emakume* feminista guzitiei, saretu gaitezen eta denon artean erantzun dezagun sagardotegi denboraldi aske eta sano baten alde».
«Eraso sexista ugari eta anitzak gertatzen dira»
Sagar Moreek azaldu dute sagardotegi denboraldia hastearekin baera, «Hernaniko kaleak, tabernak eta plazak festaz eta sagardozalez bete» direla, eta hori, «giro bikaina izan zitekeen hori, benetan erasoz betetako eremua» dela. «Normaltzat hartzen diren eraso sexista ugari eta anitzak gertatzen dira etengabean (lizunkeriak, ukitzeak, belarri-janak...). Indarkeria matxistaz ari gara».
«Lizunkeriak, ukitzeak, belarri-janak... Indarkeria matxistaz ari gara»
Baina horren aurrean, «erasotzaileei aurre egin, jarrera matxista guztiak salatu eta emakumeon* arteko sarea sustatuz, autodefentsa feministari ekinez askeak izango» direla ziurtatu dute, eta hainbat ekintza prestatu dituzte horretarako.
Batetik, otsailaren 24an eta martxoaren 17an, 13:00ean Kalekintza deitu dute, Plaza Berritik. Martxoaren 10ean, berriz, Autodefentsa Feminista tailerra izango da. Eta apirilaren 21ean, Kalekintza eta Hernaniko Emakumeon* Afari Feminista. «Emakumeok eta feministok sagardotegi garaia gustukoa dugu, festa ere bai, eta gure herriko kaleetan gauez nahiz egunez lasai eta aske bizi nahi dugu!».