Aurreko astean iragarri zuen Nafarroako Gobernuak, puntu garbiak jarriko dituela hamaika mankomunitatetan; eta horietako bat, Goizuetako Udalak aurreratu bezala, San Antongo depuradoraren ondoan egonen da, Goizueta eta Aranoko herritarrei zerbitzua emateko.
Puntu garbi berri horiek guztiak finantzatzeko, Gobernuak 2,8 milioi euro jarriko ditu; eta Hondakinen Kontsortzioak eta Iruñerriko Mankomunitateak 0,7 milioi euro.
Guztira, 3,5 milioi euroko inbertsioak eginen dituzte, 2018 eta 2019 urteetan zehar. Nafarroako Hondakinen 2017-2027 Planaren barruan kokatzen dira inbertsio horiek, eta helburua da, «%65 gaika biltzera iristea».
Obra txikietako eskonbroak, elektrogailuak, bolumen handiko hondakinak...
Goizuetan jarriko duten puntu garbia, garbigunea izanen da; eta helburua da, sortzen diren hondakin ezberdinak jasotzeko leku bat izatea. Baina mota jakin batzuetako hondakinak bilduko dira bertan: bolumen haundiko hondakinak, obra txikietako eskonbroak, elektrogailu txikiak eta poda errestoak. Izan ere, orain zailtasunak daude hondakin mota horiek jasotzeko, eta horri erantzuteko zerbitzu eraginkor bat eskaini nahi dute. Edozein kasutan, Traperos de Emausen zerbitzuak berdin jarraituko du, etxeetara joanez.
Garbigunea jartzeko, Goizuetako Udalak doaneko zesioa egin dio Mendialdeko Mankomunitateari, eta laster hasiko dituzte obrak. Lurra egokituko dute aurrena, kontenedoreak jarriko dituzte gero, eta itxitura eginen dute azkenik, sarrera bat egokituz.
Leitzan ere jarriko dute beste garbigune bat, 2018 eta 2019 bitartean. Orain, bai Goizuetan eta bai Leitzan, birziklapen etxea edo kaseta bakarrik daukate.