Euskadiko Selekzioaren deia jaso dute Ioritz Arrieta eta Eneko Aizpitarte pelotari hernaniarrek, Estatu Batuetako San Franciscora joateko. Dagoeneko bertan dira, eta torneo bat jokatuko dute datorren astean, hango Euskal Etxeak antolatuta.
Euskadiko Federazioak, urtero deitzen ditu bertan jokatzeko, denboraldian emaitza onenak lortu dituzten pelotariak. Egindako lan onaren errekonozimendua da hau, beraz.
Asteburu honetan, berriz, trinketeko Gipuzkoako Txapelketan daukate zita garrantzitsua, bi bikote hernaniarrek. Izan ere, semifinaletara pasea daukate jokoan, Ekaitz Cisnerosek eta Josu Oiagak Intzaren kontra, eta Xabat Pagolak eta Endika Arizmendik Gaztelekuren kontra. Bihar jokatuko dute bi bikoteek, 10:00etan hasita Iruran; eta irabaziz gero, semifinaletan izango dira.
Maria Granadok bigarren kanporaketa, Larrabetzun
Bestalde, Emakume Master Cup torneoaren bigarren kanporaketa jokatuko dute gaur, promozio mailan. Larrabetzun izango da, eta 17:30etan hasita jokatuko du Maria Granado hernaniarrak, Maritxu Oiartzun errenteriarrarekin. Bigarren taldean ariko dira, beste bi bikoterekin: Larrabetzuko Goiri eta Baraiazarra, eta Donostiako Galdos eta Zizurkilgo Otaegi.