Ederra egin du Oier Gurutzealdek, Iparraldeko trinkete txapelketan. Hirugarren mailan ekin bazion, aurreneko urtea zuelako, bigarrenean jokatuko du datorren urtean: igoera zuzena lortu du astigartarrak.
Izan ere, aurreko asteburuan galdu arren, aukera zeukan igotzeko, eta partidu bat jokatu beharra zeukan gaur, Azkainen, Biarriztarrakeko Andoni Mendiren kontra. Baina eskuetako minez, erretiratu egin da lapurtarra, eta hortaz, igoera lortu du Gurutzealdek, jokatu gabe.
Gipuzkoako Binakako Txapelketan, berriz, galdu egin zuen ostegunean, Urnietaren kontra (28-40). Bigarren dago sailkapenean, Urnietaren atzetik hain justu.
Ekain Lizeagak eta Aimar Mujikak, berriz, gaur jokatuko dute, 15:00etan Iruran, Oiarpe 1 taldearen kontra. Momentuz, jokatutako biak irabazi dituzte; aurreko asteburuan, 40-9 nagusitu ziren Oiarpe 2ren kontra.
Eta Egoitz eta Josu Altuna nagusiek, atsedena daukate. Aurreko asteburuan, Hernaniren kontra galdu zuten (7-40).