ARRAUN denboraldia batel estropadekin hasi zen orain aste batzuk eta gaur Maialen traineruak lehen estropada izango du Oriako uretan. 24garren Oriaren Traineru Jeitsiera jokatuko da arraunaren festa bihurtu den ekitaldi honetan. Aurten errekor guztiak gaindituko dira eta 93 ontzi uretaratuko dira, horien artean Katalunia eta Valentziatik etorritako lau llagut. Horrek esan nahi du 1.200 arraunlaritik gora partaide izango dituela. Ez da inoiz Euskal Herrian horrenbesteko partaidetza izan duen estropadarik.
Gainera, emakumeetan 20 txalupak egingo dute arraun. Lehen ontziak 16:30etan irtengo dira eta Hernaniko Maialen trainerua 17:15etan hasiko da arraunean, 4.000 metroko ibilbidean. Bere atzetik beste lau txalupa bakarrik irtengo dira; Donostia Arraun, Hibaika, San Juan eta Orio.
Sentsazioak lortu eta maila ezagutzeko estropada
Hernaniren helburua ahalik eta sentsazio hoberenak lortzea izango da eta ikustea non dauden kokatuta. Aurredenboraldiko estropada da eta horrek esan nahi du taldeek frogak egiteko erabili dezaketela estropada. Hernanik aurten Zumaiako neskekin batera ariko da eta beraz denboraldi berriko errendimendua oraingoz ezezaguna da.
Mutilen estropadan 43 traineru
Mutil hernaniarrak ere ariko dira arraunean beste talde batzutan, Fortunan beterano mailan esareako. Hala ere nagusien traineru jeitsiera da estropadarik jendetsuena.
Bertan 43 ontzi ariko dira, 6.000 metro egin beharko dituzte Mapil-Aginagatik Oriora eta azkena, Orio, 18:02an irtengo da.
Arraun Feria atzo hasi zen eta gaur luzatuko da
Arraun Feria antolatu dute oriotarrek bi egunetan. Atzo aurkezpen ekitaldia egon zen eta pintxopotea arraunetxean eta gaur 10:00etatik 20:00etara. Nutrizio hitzaldia, ergonometroen mantenimendua, arraunetxera bisita, stand-ak... denetarik egongo da.