Errauste planta geldiarazteagatik auziperatu dituzte Ainhoa Intxaurrandieta, Gipuzkoako Hondakinen Kudeaketako presidente ohia, eta Iñaki Errazkin, ingurumen diputatua zena. GHKren egungo zuzendaritzak eraman ditu auzitara. Eta horren aurrean, bere elkartasuna adierazi nahi izan die Gipuzkoa Zutik mugimenduak, auziperatuei.
Horretarako antolatu du Elkartasun Bira, eta Hernanin egingo du aurreneko geldialdia, gaur: Angula ustelak hitzaldia eskainiko du Intxaurrandietak berak, arratsaldeko 19:00etan hasita, Biteri kultur etxean.
Hitzaldiaren kartelean bertan, bere babesa erakutsi die Gipuzkoa Zutikek: «euskal erregimenari aurre egiteagatik epaituak izango dira. Zuekin gaude! Norbait epaitzekotan, epaitu ditzatela politikari ustelak!», adierazi dute.