Trapu koloretsuen artean nabarmendu da eguraldi txarraren iluntasuna pasa den asteburuan, inauterien egunetan. Horren gainetik, ordea, ondo pasatzeko gogoa zeukaten astigartarrek eta hala egin dute; mozorro eroak armairutik atera eta festa abiatu ziren larunbat arratsaldean Joseba Barandiaran plazara.
Igandean, aldiz, Astigarte dantza taldeko kideen txanda izan zen; urtero bezala, Euskal Inauteriak ospatu zituzten. Dena den, oraingo honetan plan alternatiboari jarraitu behar izan zioten, prezipitazio ugariak zirela-eta.
Horrela bada, Ergobiatik kalejiran abiatu beharrean, zuzenean Txomiñenea frontoian egin zuten ekitaldia, eguerdian. Bertan dantzatu zituzten, besteak beste, Goizuetako Zahagi Dantza eta Lantzeko inauteria.
Larunbatean Zipotzan egingo dute afaria; txartelak salgai daude, 20 euroan.
Larunbatean, Kaldereroak
Inauteriak pasata, urtero bezala, Kaldereroen txanda izango da larunbat honetan. Ergobiatik abiatuko dira zartagiari eta lapikoei eragiteko gogoz, 17:30etan hasita. Handik, saltoka eta abestuz iritsiko dira Joseba Barandiaran plazara, eta han emango diote bukaera. Ondoren, Zipotza elkartean afaltuko dute; txartelak salgai daude, 20 euroan, Zipotzan bertan.