Eguraldi kaxkarrak ez ditu tristetu hernaniarrak, eta zeruko grisari lurreko kolore argiekin egin diote aurre, Inauteri hauetan ere. Atzokoan, euriak tregoa ematen zuenetan, maxkuri zaparradek blaitzen zituzten bizkarrak, Axeri dantzan edota Erraldoi eta Buruhaundietan.
Gaur, ordea, suaren txinpartak jango ditu azken koloreak, sardinaren ehorzketan; 18:30etan abiatuko da hileta martxa, Plazatik.
Balorazio bilera, bihar
Gaurkoan Inauteriak bukatuta, azkar jarri da zita balorazioa egiteko. Kultur etxetik jakinarazi dute bihar bertan, 19:00etan egingo dela bilera ireki hori, Biterin. Nahi duenak hartu dezake parte.