«Hernaniko PSE-EEtik, lortu dugu EH Bilduren gobernuaren konpromisoa, aurten ere dirulaguntzak emateko, Kaxkoko etxebizitzetan leihoak aldatzeko. Hala argitaratu da Gipuzkoako Aldizkari Ofizialean», azaldu du Ricardo Crespok, Hernaniko alderdi sozialistaren bozeramaileak: «azkenean bai, eskainiko da dirulaguntza partida bat aurten ere, Kaxkoan leihoak aldatzeko».
Crespok nabarmendu du, PSE-EEk proposatu zuela dirulaguntza partida hori, orain dela bi urte, 2016ko aurrekontuen proiektuaren negoziaketetan: «orduan, EH Bildurekin negoziatu ondoren, 60.000 euroko partida bat lortu genuen, Kaxkoko leihoak aldatu eta irisgarritasunerako hobekuntzak, igogailuak adibidez, diruz laguntzeko. Hala ere, 80.000 euroko partida eskatu genuen guk», azaldu dute.
2018ko udal aurrekontuen harira, berriz, Crespok gaitzetsi egin zuen udal gobernuaren portaera, bi ekimenak ez zirelako «behar bezala gauzatu», eta «hiltzen utzi» zituelako.
«Iaz, Udalak soilik 10.000 euro bideratu zituen leihoak aldatzera, baina ez zen modu egokian iragarri, eta horrek eragin zuen, eskaera kopurua oso txikia izatea. Horregatik, aurten Kaxkoko bizilagunak animatu nahi ditugu, Udalera gerturatu, dirulaguntza horiengatik galdetu eta eskaera egitera», adierazi du Crespok.
«Leihoak aldatzea ez da nahikoa, bizi kalitatearen beherakada arintzeko»
Hernaniko PSE-EEk azaldu du, bi helbururekin proposatu zituela dirulaguntzak: «energia kontsumoa gutxitu eta etxeetako baldintza termikoak hobetzea; eta txotx garaiko zarata arazoak gutxitu eta elkarbizitza arazoak arintzea. Hala ere, badakigu leihoak aldatzea ez dela nahikoa, bizi kalitatearen beherakada hori arintzeko. Udalak neurriak hartu behar ditu, hernaniarren atsedenerako eskubidea bermatzeko».
Azkenik, udal gobernuari eskatu dio, lehenbailehen argitaratu dezan, irisgarritasun arazoak konpontzeko dirulaguntzen deialdia ere.