«Emozio asko geneuzkan, baina begira zein geratu zaigun azkenean: beldurra. Horixe pasako duzue gaur! Mota guztietako pertsonaiak izango ditugu, alaiak, bihurriak, beldurgarriak... baina denak maitagarriak!», aurreratu zieten atzo, Emozioz blai! emanaldira gerturatu zirenei.
Eta hala izan zen, beldurrezko antzerki eta dantza saioa eskaini baitzuten Herri Eskolako ikasleek, inauteriei hasiera emateko. Eta nolako hasiera! Dardarka jarri zituzten ikusle guztiak, eta ez hotzagatik, goxo goxo baitzegoen kiroldegia.
Festa gaur arratsaldean, Txomiñene frontoian
Atzo txikienek hasitako bideari, gaur jarraituko diote herritarrek, eta festa egingo dute arratsaldean. Hasiera batean Joseba Barandiaran plazan egitekoak ziren, baina eguraldi txarra emana dagoenez, Txomiñene frontoian egingo dute ziurrenik.
Arratsaldeko 16:30etan ekingo diote, inauterietako mozorroei azkeneko ukituak emanez: haurrentzako makilatze eta orrazketa tailerrak jarriko dituzte bertan. Eta denak txukun txukun apaindu ondoren, disko festa hasiko da, Julen Ibarrola DJarekin, 17:00etan.
Berak bukatzean, herriko kaleetan barrena segiko du festak, txaranga aterako baita arratsaldeko 19:30etan.
Euskal Inauterien konpartsa, Ergobiatik bihar
Bihar, berriz, Euskal Inauterien konpartsak hartuko du erreleboa. Printzipioz, eta eguraldiak laguntzen badu, 11:30etan abiatuko dira Ergobiatik, Astigar taldeko dantzariak eta Txirrisklako txistulariak; eta Joseba Barandiaran plazara bidean, dantzatuko dituzte Goizuetako Zahagi Dantza, Oriako Sorgin Dantza, eta Lantzeko inauteriko dantzak. Bukaeran, plaza dantza saio irekia izango da, 13:30ak aldera.
Eguraldia txarra eginez gero, ordea, Txomiñenen elkartuko dira, eguerdiko 12:00etan, eta bertan eskainiko dituzte dantza saioak.
Kaldereroak gaur zortzi, bi ordu lehenago
Eta kaldereroek segiko dute izaten Astigarragako berezitasuna, inauterietan: inauteriak datozela iragarri beharrean, bukaera ematera etorriko dira. Gaur zortzi izango da hori, datorren larunbatean, Ergobiatik abiatu eta Joseba Barandiaran plazaraino. Hori bai, ordu aldaketa izan da, eta arratsaldeko 17:30etan abiatuko dira azkenean, ez 19:30etan.
Bukaeran, afaria egingo dute, Zipotza elkartean, eta txartelak salgai daude bertan.