Santa Ageda bezpera euritsua tokatu da aurten, baina horrek ez ditu ereñotzuarrak kikildu.
Igandean, sekulako jasa bota zuela-eta, atzeratu egin zuten errondan ateratzeko ordua, baina behin aterata, gogotik ekin zioten kantuari eta makilak astintzeari. Agian horrexegatik, atertu egin zuen puska baterako, eta makilkada horiekin esnarazi zuten lurra.
Pagoagatik hasita, Larre Gaineraino
Urtero bezala, Ur Mian jarri zuten hitzordua, eta Pagoagara abiatu ziren aurrena. Aurtengoan auzotarrek ere lagundu zieten, kantuan.
Handik Lastaolarako bidea hartu zuten gero, etxez etxe eta baserriz baserri kantatzeko.
Bukaera, beti bezala, Larre Gainen egin zuten, eta azken saioa, nola ez, aurrekoak baino luzexeago joan zen. Horrela, indarrak berreskuratzeko aitzakian, afariarekin borobildu zuten saioa.