Gipuzkoako Txapelketan bakarrik ez, Iparraldekoan ere ederki dabil Oier Gurutzealde, trinketean. Aurreneko lau partiduak irabazi ditu, eta gaurkoa izango du klabea, bigarren mailara igotzeko: Baigorriko Iñaki Goikoetxea izango du aurrean, lau partiduak irabazita bera ere. Hortaz, bien artekoa irabazten duenak bukatuko du ligaxkako lider, eta datorren astean jokatuko du, igoera lortzeko partidua.
Arratsaldeko 18:00etan jokatuko dute gaur, Hendaian; eta badauka esperantza Gurutzealdek, irabazi eta igoera lortzeko lehian sartzeko.
Gipuzkoakoan pleno, aurreko asteburuan
Gipuzkoako Txapelketan ere, fin ari dira astigartarrak. Gurutzealdek 40-33 irabazi zuen Lopez hernaniarrarekin, Muguruza eta Larrañagaren kontra, eta lider daude, lehenengo mailan. Atseden hartuko dute asteburu honetan.
Nagusien bigarren mailan, berriz, 40-0eko garaipena izan zuten Egoitz eta Josu Altunak, Azkoitiako bikotea ez zelako aurkeztu partidura. Horrela, bigarren daude, bat irabazi eta bat galduta, eta gaur daukate hirugarrena: Hernaniren kontra ariko dira, 10:30etan hasita, Irurako Ametsa trinketean.
Eta kadeteetan, garaipen batekin ekin zioten txapelketari, Ekain Lizeagak eta Aimar Mujikak: 40-14 irabazi zieten, Apaolaza eta Oyarzabal hernaniarrei. Gaur daukate bigarren partidua, Iruran haiek ere, baina arratsaldez. Oiarperen kontra jokatuko dute, 15:00etan hasiko den jaialdian.