Atsedenik ez dute izango pelotari hernaniarrek, asteburu honetan ere, eta hainbat partidu jokatuko dituzte. Bereziki kargatua izango du asteburua Markel Lizeagak. Tolosan jokatuko du gaur atzelari hernaniarrak, Prietorekin, Prado eta Ruizen kontra. 16:00etan izango da hori.
Eta atsedenerako tarterik gabe, bihar goizean jokatuko du Ortuellan, partidu garrantzitsua gainera: Pablo Elortegi torneoko semifinala izango du, Jon Alberdi azpeitiarrarekin, Lopez Aldai eta Bergeraren kontra. Goizeko 11:00etan izango da, eta ez dauka lan erraza Lizeagak, bikote indartsu baten kontra; horri nekea gehitu beharko zaio, gainera. Edozein kasutan, finalerako txartelaren bila joango da.
Bestalde, trinketeko Gipuzkoako Txapelketako konpromisoak izango dituzte gaur, Cisneros-Oiaga, Arizmendi-Aldunberri eta Insausti II-Lasa bikote hernaniarrek, Iruran.