Partidu zaila zeukan Mundarrok larunbatean, eta ez zuen aukerarik izan ezustekoa emateko, Deusto liderraren zelaian, Zubietan. Galdu egin zuten moreek (4-0), hasiera txarrari buelta eman ezinda.
Izan ere, larunbat arratsaldeko giro hotz eta euritsuak izoztu balitu bezala, ez ziren ondo zelairatu astigartarrak, eta beraien akatsak tarteko, berehala aurreratu zen Deusto: 10garren minuturako, bi gol jaso zituen Mundarrok.
Hortik aurrera, kontrol lanera mugatu zen Deusto, eta aurrerapauso bat eman zuten moreek, kornerrak eta faltak probokatuz. Baita aukera eder bat izan ere, aurreneko gola egiteko, baina ezin asmatu.
Moteletik hasi zuten bigarren zatia, inork ez baitzuen arriskatu nahi: etxekoek emaitza mantendu nahi zuten, eta Mundarrok partiduan iraun. Baina hirugarren golarekin, moreen nahiak zapuztu zituen Deustok. Hortik aurrera, behera egin zuen Mundarrok, buruarekin baino bihotzarekin jokatuz, eta laugarren gola ere jaso zuen.