Larunbatean jokatu zen, Donostiako belodromoan, Pista Sariaren azkeneko jardunaldia. Emoziorik ez zuen falta izan egunak, eta txirrindulari astigartarrentzat, bikain bukatu zen txapelketa: Urko Semperenak lidertzari eutsi eta garaipena lortu zuen open kategorian, Jaime Romero bigarren postura igo zen kadeteetan, eta Telmo Semperena aurreneko bostetan sartu zen jubeniletan.
Erremate bikaina eman zion Urko Semperenak, Pista Sariari; baina ez zuen lan erraza izan. Sei punturen aldearekin iritsi bazen azkeneko jardunaldira, puntu bakarrera jarri zitzaion Igor Arruti, eliminazioko probaren ondoren: hirugarren izan zen Semperena, eta irabazi egin zuen Arrutik. Eta puntuazioan, azkenekoan, bien arteko kontrola izan zen nagusi. Bi esprint irabazi zituen astigartarrak; baina bi esprint falta zirenean, erorketa bat izan zen, eta txirrindulari bat pistan bertan atenditu behar izan zutenez, bukatutzat eman zuten proba, momentuko puntuazioekin. Horrela, Semperenak puntu bat lortu zuen, Arrutik bat ere ez, eta astigartarrak lortu zuen garaipena, Pista Sarian.
Romero, bere aldetik, hirugarren iritsi zen azkeneko probetara, eta bigarrenari, Aritz Seini, aurreratzea zuen helburu. Baita lortu ere! Scratchean bigarren izan zen, dagoeneko Sein aurreratuz. Eta bera baino hobeto aritu zen puntuazioan ere, bi esprint irabazita, bigarren postuarekin geratzeko.
Eta jubeniletan, azkenik, seigarren postutik bosgarrenera aurreratu nahi zuen Telmo Semperenak, podiumerako aukerarik gabe. Tempoan, hasteko, bosgarren izan zen, eta horrekin, bosgarrena berdindu zuen sailkapenean, dena puntuazio proban jokatzeko: 10 esprintetatik 5etan puntuatu, eta bosgarren bukatu zuen Semperenak, azkenean.
Gipuzkoako Txapelketa, gaur
Gaurkoan, berriz, Gipuzkoako Txapelketan ariko dira, kategoria guztietan. Omnium bat izango da, lau probakoa: bi proba izango dituzte goizean, scratch eta tempo, 10:30etan; eta arratsaldean beste bi, eliminazioa eta puntuazioa, 16:00etan.