Maila ederrean ari da Aimar Olaizola, Binakako Txapelketa Nagusian. Goizuetarra hirugarren dago ligaxkako sailkapenean, Ander Imaz oiartzuarrarekin, hamar partidutik sei irabazita. Baina gainera, txapelketako pilotari onenaren sailkapenean, bera dago aurreneko postuan, oraingoz.
Goizuetarrak gaur jokatuko du, 11garren jardunaldiko partidua, Iruñako Labriten. Arratsaldeko 17:30etan hasiko da jaialdia, eta Ezkurdia eta Zabaletaren kontra ariko da.
Goizuetako haur eta gazteek ere, jokatuko dute asteburuan. Legarreta eta Elizegi alebinek, Arbizun jokatuko dute 11:00etan, Nafar Jokoetan. Apezetxea jubenilak, berriz, Tolosako Miguel Soroa Memorialean jokatuko du Osa andoaindarrarekin, 16:30etan, Mata eta Ibarlozaren kontra.
Eta Apezetxeak berak eta Aizkorbek, Malerrekako Txapelketakoa jokatuko dute bihar, eguerdiko 12:00ak aldera, Ruiz de Larramendi eta Garmendia lazkaotarren kontra.
Iker Salaberria seniorrak, berriz, astean zehar jokatu du. Asteazkenean, Malerrekako Txapelketaren semifinala irabazi zuen, Mariezkurrenarekin, Barbajero eta Minaren kontra (22-13). Hilaren 24an jokatuko dute finala.