Sahararen Euskal Karabanaren bitartez, sahararren errefuxiatu kanpamenduetara iritsiko dira laster, bildu diren elikagai eta produktuak. Bilketa horretan hartu du parte Astigarragak, eta EH Bilduk zoriondu egin ditu herritar eta komertzioak.
«Aurten ere Sahararen aldeko janari bilketa oparoa izan da»
EH Bilduren esanetan, «aurten ere Sahararen aldeko janari bilketa oparoa izan da», eta horrexegatik, eskerrak eman nahi izan dizkie parte-hartzaile guztiei. Batetik, «ezinbestekoak izan diren komertzioei: Coviran, Isabel, Coviran Ainhoa, Alicia Frutadenda, Zubitxo, Eroski eta Ezpela Belardendari».
Era berean, «Sahararen alde aletxoa jarritako herritar guztiei» ere eskerreak eman dizkie. «Astigarraga herri eskuzabala erakutsi dugu berriz».
«Aurtengoan ere, EH Bilduk antolatu behar izan du»
Hala ere, kritika ere egin du EH Bilduk prentsa oharrean. «Aurtengoan ere, EH Bilduk antolatu behar izan du ekimena herrian. Hirugarrenez. Nahiz eta hau saihesteko 2016ko otsailaren 2an Sahararen aldeko mozio bat aurkeztu zuen EH Bilduk».
Mozioaren azken puntuan «Astigarragako Udalari Sahararen Euskal Karabanaren ekimenean zuzenean eta aktiboki parte hartzeko» eskaera jasotzen zen, eta mozioa «aho batez onartu» zela gogorarazi du EH Bilduk, baina «EAJko udal gobernuak berriro ezer ez egin» izana salatu du. «Saharako herriarekiko elkartasun falta berriz ere erakusteaz gain, Plenoaren agindua ez du bete EAJk». Hala ere, «saharar herriarekiko elkartasunak Astigarragan etenik izan ez dezan lanean jarraituko» dutela dio.